Dövlət ümumtəhsil müəssisələrində vakant vəzifələrə işə qəbul üçün test imtahanları keçirilir

NUHÇIXAN xəbər verir ki, Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya tərəfindən muxtar respublikanın dövlət ümumtəhsil müəssisələrində psixoloq, laborant, kitabxana müdiri, kitabxanaçı, tərbiyəçi və uşaq birliyi təşkilatının rəhbəri vəzifələrinə işə qəbul üçün 4 sentyabr 2019-cu il tarixdə elan edilmiş müsabiqənin test imtahanlarına başlanılıb.

Müsabiqəyə çıxarılan 148 vakant vəzifənin tutulması üçün 225 namizəd sənəd təqdim edib. Test imtahanında iştirakçılara 80 sual təqdim olunub, sualları cavablandırmaq üçün 120 dəqiqə vaxt verilib. İmtahanlarda test tapşırıqlarının ən azı 50 faizini düzgün cavablandıran namizədlər müvafiq keçid balını toplamış hesab olunurlar. Qanunvericiliyə əsasən keçid balını yığmaqla ən yüksək bal toplayan şəxs müvafiq vəzifəyə təyin olunacaq.

Test imtahanlarının nəticələri Dövlət Qulluğu Məsələləri üzrə Komissiyanın rəsmi internet portalında yerləşdirilir. İmtahanlar 7 noyabr 2019-cu il tarixədək davam edəcək.

Cavid Səfərli