Naxçıvanda Respublika üzrə Fənn Olimpiadasının final turu keçirildi - FOTOLAR

NUHÇIXAN İnformasiya Agentliyi xəbər verir ki, bu gün  Naxçıvan şəhər 4 nömrəli tam orta məktəbdə pandemiya ilə əlaqədar olaraq  təxirə salınan Respublika fənn olimpiadasının fizika və riyaziyyat fənləri üzrə  final turu keçirilib. Olimpiadada 23 şagird iştirak edib.

İştirakçıların təhlükəsizliyinin təmin edilməsi məqsədilə onlar arasında məsafəyə diqqət yetirilib, sağlamlıqlarının qorunması üçün bütün qabaqlayıcı tədbirlər görülüb.

Fevral ayında keçirilən respublika mərhələsinin yarımfinal turunun nəticələrinə əsasən, muxtar respublika üzrə uğur qazanan 87 şagirddən 23 nəfəri bu mərhələdə iştirak edib. Şagirdlərə sualları cavablandırmaq üçün 4 saat vaxt verilib.   

Qeyd edək ki, ötən tədris ilində 8 fənn üzrə keçirilən Respublika fənn olimpiadasında şagirdlərdən 2-si qızıl, 6-sı gümüş, 17-si bürünc olmaqla 25 medal qazanıblar.

Nurlana Əhmədova