NDU müəlliminin elmi məqaləsi nüfuzlu jurnalda dərc olunub

NUHÇIXAN İnformasiya Agentliyi xəbər verir ki, Naxçıvan Dövlət Universiteti İnformatika kafedrasının baş müəllimi Sevinc Paşayevanın məqaləsi nüfuzlu “International Journal of Modern Education and Computer Science (IJMECS)” jurnalında nəşr olunub.

“Direktiv sənəd bazasında informasiya axtarış sisteminin bəzi istismar xarakteristikalarının təyin edilməsi” adlı  məqalədə direktiv sənəd bazasında informasiya axtarış sisteminin bəzi istismar xarakteristikalarının təyin edilməsi üçün metod verilib. Sistemin istismarının həyat dövrləri araşdırılıb və sistem işə salındıqdan sonra aşınma və sıradan çıxma dövrü haqda ətraflı məlumat əks olunub. Məqalə sistemin normal istismar dövründə bəzi istismar xarakteristikalarının araşdırılmasına həsr edilib.

Qeyd edək ki, jurnal müasir təhsilin və informatika (kompüter) elminin nəzəriyyə və təcrübəsini birləşdirməyə çalışır. İnnovativ ideyalardan spesifik alqoritmlərə və sistemin tam tətbiqinə qədər müasir təhsil və kompüter elmləri sahəsində orijinal və yüksək keyfiyyətli məqalələr dərc edən jurnal  müasir təhsil və tətbiqetmələr sahəsində qabaqcıl texnologiyalar üzərində işləyir və “CrossRef”, “Google Scholar”, “EBSCO”, “JournalSeek” kimi elmi bazalarda indeksləşir.

Səadət Əliyeva