Naxçıvanda ikinci və üçüncü qruplar üzrə ali məktəblərə qəbul imtahanı keçirilib - FOTOLAR
NUHÇIXAN İnformasiya Agentliyi xəbər verir ki, avqustun 14-də Naxçıvanda Azərbaycan Respublikasının ali təhsil müəssisələrinə qəbul olmaq istəyən abituriyentlər üçün ikinci və üçüncü ixtisas qrupları üzrə qəbul imtahanlarının ikinci mərhələsi keçirilib.
Qəbul imtahanlarının ikinci mərhələsi Naxçıvan şəhərində 8 ümumtəhsil məktəbində aparılıb. İmtahanda 1870 abituriyentin iştirakı nəzərdə tutulub.
Bütün binalarda eyni vaxtda saat 11:00-da başlayan imtahan 3 saat davam edib. Abituriyentlərə hər fənn üzrə 30 test tapşırığı təqdim olunub.
Pandemiya şəraitinin tələblərinə əsasən iştirakçıların yalnız tibbi maska ilə imtahan binasına daxil olmasına icazə verilib. Buraxılış rejimi yeni qaydalara uyğun şəkildə tənzimlənib, imtahan heyəti müvafiq qoruyucu vasitələrlə (xüsusi geyim, əlcək, üz sipəri, tibbi maska) təmin olunub.
Kütləviliyin və təmas hallarının qarşısının alınması məqsədilə imtahan iştirakçıları üçün imtahan binasına müxtəlif daxilolma vaxtları müəyyən edilib. İmtahan keçirilən binaların qarşısında sırada gözləmək üçün nişanlayıcı xətlər çəkilib. İmtahan binasına buraxılış rejiminin növbə ilə – lazımi sosial məsafəni gözləməklə təşkil edilməsinə nail olunub. İmtahan binasına daxil olan iştirakçıların məsafədən ölçə bilən elektron termometrlə bədən hərarətləri yoxlanılıb, zəruri dezinfeksiyaedici vasitələrdən istifadə edilib.
Qeyd edək ki, avqustun 21-i birinci və dördüncü ixtisas qrupları üçün qəbul imtahanının ikinci mərhələsi keçiriləcək.
Ərhan Novruzov