“Dilimiz varlığımızdır” kitabının təqdimatı keçirildi

“Dilimiz varlığımızdır” kitabında professor Sədaqət Həsənovanın  son illərdə  araşdırmalarının nəticələri əks olunub. Müəllif Azərbaycan üslubiyyat elmi ilə bağlı ardıcıl məşğul olan alimlərimizdəndir. Onun 2017-ci ildə çap olunmuş irihəcmli “Dilimiz mənəvi kimliyimizdir” adlı kitabı elmi ictimaiyyətin  diqqətini çəkib.

NUHÇIXAN İnformasiya Agentliyi xəbər verir ki, bu barədə “Naxçıvan” Universitetinin Elmi kitabxanasında keçirilən  təqdimat mərasimində  ali təhsil ocağının rektoru, filologiya üzrə fəlsəfə doktoru, dosent Nurlana Əliyeva danışıb.

Daha sonra universitet müəllimlərinin kitabla bağlı çıxışları dinlənilib.

Bildirilib ki, professor Sədaqət Həsənovanın  araşdırmalarında dilçilik elminin müxtəlif  sahələrinə aid mövzulardan bəhs olunur. Lakin onun  elmi  yaradıcılığında  üslubiyyat məsələləri qırmızı xətlə keçir. Müəllifin  “Dilimiz varlığımızdır” kitabında  İmaməddin Nəsimi, Molla Cuma, Cəlil Məmmədquluzadə, Zeynal Cabbarzadə, Fikrət Qoca, Əli Kərim, Eldar Baxış, Nəriman Həsənzadə, Musa Yaqub və başqa söz adamlarının  dilindəki yeniliklər üzə çıxarılıbdır.

Sonda professor Sədaqət Həsənova çıxış edərək  tədbir iştirakçılarına və  tədbirin təşkilatçılarına  minətdarlığını bildirib.

Qeyd edək ki, “Əcəmi” Nəşriyyat-Poliqrafiya Birliyində nəşr olunan “Dilimiz varlığımızdır” kitabının elmi redaktoru dosent Qənirə Əsgərovadır. 

                                                                           Seyfur Hacımuradov