AMEA Naxçıvan Bölməsi hesabat verdi - FOTOLAR
NUHÇIXAN İnformasiya Agentliyi xəbər verir ki, AMEA Naxçıvan Bölməsində bölmənin 2020-ci ilə aid elmi və elmi-təşkilati fəaliyyəti ilə bağlı hesabatı olub.
Hesabata başlamazdan əvvəl bölmədə cari il ərzində çap olunmuş elmi əsərlərdən və tətbiqyönümlü məhsullardan ibarət sərgiyə baxış olub.
Tədbirdə bölmənin sədri, akademik İsmayıl Hacıyev 2020-ci ildə görülmüş elmi işlərlə bağlı məruzə edib. Bildirilib ki, cari tədqiqat dövründə bölmə əməkdaşlarının 18 monoqrafiyası, 19 kitabı, 1 metodik vəsaiti, 462 elmi məqaləsi, 207 konfrans materialı, 12 tezisi olmaqla 719 elmi əsəri çap olunub, bir xəritə və bir buklet tərtib edilib. Ümumilikdə 174 əsər xaricdə nəşr olunub. Məqalələrin 57-si impakt faktorlu jurnallarda, elmi məqalələrin isə 432-si beynəlxalq kodlu nüfuzlu elmi jurnallarda çapdan çıxıb. Həmçinin bölmədən seçilən 2 akademikin və 7 müxbir üzvün il ərzində 100 əsəri, o cümlədən 6 monoqrafiyası, 3 kitabı, dərslik, metodik vəsait, elmi məqalə və konfrans materialları çapdan çıxıb. Əsərlərdən 2 monoqrafiya, 19 məqalə, 12 konfrans materialı xaricdə nəşr olunub.
Keçirilən “Görkəmli Azərbaycan mütəfəkkiri: Nemətullah Naxçıvani” beynəlxalq konfransının və Naxçıvan Muxtar Respublikasının 95 illiyi ilə əlaqədar “Naxçıvanın muxtariyyəti: tarixdə və günümüzdə” respublika konfransının materialları nəşr olunub, “Naxçıvan tarixi-mənbələrdə”, eləcə də, 1 kitab və 4 monoqrafiya, 260 məqalə çapa təqdim edilib. O da qeyd olunub ki, bölmədə iki seriya üzrə “Elmi əsərlər” və “Axtarışlar” jurnalının hər birinin 3 nömrəsi çapdan çıxıb. Eyni zamanda cari ildə bölmə üzrə 2 beynəlxalq səviyyəli qrant layihəsinin icrası davam etdirilib.
AMEA Naxçıvan Bölməsi və Naxçıvan Muxtar Respublikası Ekologiya və Təbii Sərvətlər Nazirliyi “İlandağ” geoparkının yaradılması ilə bağlı lazımi işlər görür. Geoparkın öyrənilməsi ilə bağlı yaradılan tədqiqat qrupu tələblərə uyğun materiallar toplayıb, sistemləşdirib, tədqiq olunaraq qruplaşdırıb. Belə ki, Geoparkın ərazisində yerləşən 34 adda tarix-mədəniyyət, 41 adda arxeoloji abidənin və 32 adda geositin ətraflı təsvirləri verilib, pasport qeydiyyat kartları hazırlanıb.
Hesabat dövründə bölmənin xarici ölkələrin müvafiq qurumları ilə beynəlxalq əlaqələrindən bəhs edən İsmayıl Hacıyev bildirib ki, Bölmənin əməkdaşları 20-dən çox elm və təhsil mərkəzi və bir çox ölkələrin alimləri ilə sıx elmi əlaqələrdə оlaraq səmərəli əməkdaşlıq ediblər.
Müvafiq dövr ərzində Bölmənin Maddi-texniki bazasının artırılması işi diqqətdə saxlanılıb. Bölmənin “Yaşıl Aptek”i yenidən qurularaq istifadəyə verilib.
Bölmənin Ordubad rayonunun Aşağı Əylis kəndində yerləşən Biokimyəvi tədqiqatlar laboratoriyasının bazasında bitkilərdən müxtəlif efir yağları, gülab, boya, doşab alınması planlaşdırılıb və artıq gülab istehsalına başlanılıb.
Cari müddət ərzində peşəkar kadrların hazırlanması istiqamətində də işlər görülüb. Naxçıvan Muxtar Respublikası Ali Məclisi Sədrinin Sərəncamına əsasən AMEA Naxçıvan Böməsinə hamiliyə verilən Naxçıvan Dövlət Universitetinin 5 ixtisası ilə elmi-tətqiqat müəssisələrində müvafiq layihələr çərçivəsində tədbirlər keçirilib. Həmçinin müvafiq dövr çərçivəsində bölmə ilə Təhsil Nazirliyinin birgə həyata keçirdiyi “Sabahın tədqiqatçıları” layihəsi çərçivəsində Naxçıvan şəhərinin ümumtəhsil məktəblərindən 50 şagird bölmə alimləri tərəfindən hamiliyə götürülərək, fərdi və kollektiv şəkildə tədqiqatlara cəlb edilib və uğurlu nəticələr əldə olunub.
Tədbirdə AMEA Naxçıvan Bölməsinin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Fəxrəddin Səfərli, İncəsənət, Dil və Ədəbiyyat İnstutunun direktoru, AMEA-nın müxbir üzvü Əbülfəz Quliyev və digərləri məruzə ətrafında çıxış edərək görülən işlər barədə məlumat veriblər.
Sonda bölmənin əməkdaşlarından Pərviz Fətullayevə və Fizzə Quliyevaya “İlin alimi” diplomları təqdim olunub.
Ərhan Novruzov