Naxçıvan məktəbliləri üçün Aşıq Ələsgərin yaradıcılığına həsr olunmuş interaktiv dərs keçirildi - FOTOLAR

Naxçıvan Muxtar Respublikası Təhsil və Mədəniyyət nazirliklərinin birgə təşkilatçılığı ilə Naxçıvan Muxtar Respublikası Ədəbiyyat Muzeyində  keçirilən interaktiv dərs  Aşıq Ələsgərin  200 illik yubileyinə həsr olunub.  Təhsil Nazirliyinin mətbuat xidmətindən NUHÇIXAN İnformasiya Agentliyinə bildirilib ki, 200-dən çox ümumtəhsil məktəbində izlənilən dərsi AMEA Naxçıvan Bölməsi İncəsənət, Dil və Ədəbiyyat İnstitutunun “Ədəbiyyatşünaslıq” şöbəsinin müdiri, filologiya üzrə fəlsəfə doktoru, dosent Ramiz Qasımov keçib.

Qüdrətli söz ustadlarından olan Aşıq Ələsgərin nəinki Azərbaycanda, bütün türk dünyasındakı yerindən danışan Ramiz Qasımov sənətkarın irsinə həmişə qayğı göstərildiyini, Azərbaycan Respublikasının Prezidenti cənab İlham Əliyevin “Aşıq Ələsgərin 200 illik yubileyinin qeyd edilməsi haqqında” 18 fevral 2021-ci il tarixli Sərəncamının da bu diqqət və qayğının bariz bir ifadəsi olduğunu deyib.

Dərsdə vurğulanıb ki, dəfələrlə Naxçıvanda da olan qüdrətli söz ustası, gözəl saz-söz məclisləri keçirib. Bununla bağlı “Aşıq Ələsgərin Naxçıvan səfəri” dastan-rəvayəti yaranıb. Ümumiyyətlə, Göyçə aşıq mühiti, xüsusən də Aşıq Ələsgər yaradıcılığı və məktəbi Şərur-Naxçıvan-Şahbuz aşıqlarının yaradıcılığına, sənətdə inkişaf edib təşəkkül tapmalarına güclü təsir edib.

Qeyd edək ki, aşığın 200 illik yubileyinin muxtar respublikamızda da yüksək səviyyədə qeyd edilməsi məqsədilə Naxçıvan Muxtar Respublikası Ali Məclisi Sədrinin 22 fevral 2021-ci il tarixli Sərəncamı ilə “Aşıq Ələsgərin 200 illik yubileyinə həsr olunmuş Tədbirlər Planı” təsdiq edilib.