Naxçıvanda müəllimlərin işə qəbulu ilə bağlı keçirilən test imtahanları başa çatıb

Dövlət İmtahan Mərkəzinin mətbuat xidmətindən NUHÇIXAN İnformasiya Agentliyinə bildirilib ki, 858 namizədin sənəd təqdim etdiyi müsabiqəyə 214 vakant vəzifə çıxarılıb. Bu dəfəki müsabiqəyə indiyə qədər bu istiqamətdə keçirilmiş imtahanlar üzrə ən çox müraciət qeydə alınıb. Daha çox qeydiyyat Şərur (225), Ordubad (161) və Culfa (121) rayonları üzrə olub.

Müsabiqənin nəticələrinə görə 171 vəzifənin tutulması üçün imtahanlarda iştirak edən 829 namizəddən 134 vəzifə üzrə 493 namizəd müvafiq keçid balını toplayıb. 37 vəzifə üzrə heç bir namizəd keçid balını toplaya bilməyib.

Müsabiqədə iştirak edənlərlə müvəffəqiyyət qazananların say nisbətində ən yüksək nəticələri isə Babək rayonu (83 %), Naxçıvan şəhəri (70 %), Culfa (69 %) və Ordubad (58 %) rayonlarından müraciət edən namizədlər göstərib.

“Naxçıvan Muxtar Respublikasında pedaqoji heyətin dövlət ümumi təhsil və peşə təhsili müəssisələrinə işə qəbulu, bilik və bacarıqlarının aparılması qaydaları”na uyğun olaraq vakant vəzifənin tutulması üçün müraciət etmiş namizədlər arasında keçid balını toplamaqla ən yüksək nəticə göstərmiş şəxs müvafiq vəzifəyə təyin olunacaq.

Qeyd edək ki, test imtahanları şəffaflıq əsasında elektron proqram təminatı vasitəsilə 2-16 avqust tarixlərində keçirilib. İmtahan bitdikdən dərhal sonra iştirakçılara test imtahanlarının nəticəsinə dair arayış təqdim edilib.