“Əsrə bərabər illər” kitabının təqdimatı keçirilib - FOTOLAR
NUHÇIXAN İnformasiya Agentliyi xəbər verir ki, jurnalist Rauf Əliyevin müəllifi olduğu kitabın təqdimat mərasimi AMEA Naxçıvan Bölməsində təşkil olunub.
Naxçıvan Bölməsinin sədri, akademik İsmayıl Hacıyev jurnalist Rauf Əliyevi təbrik edib. Bildirib ki, kitabda “AZƏRTAC” informasiya agentliyi və “Şərq qapısı” qəzetində işıq üzü görmüş analitik materialları toplanılıb. Bu məqalələrdə 2015-2020-ci illərdə Naxçıvan Muxtar Respublikasının ictimai-siyasi, sosial-iqtisadi həyatına qızıl hərflərlə yazılmış müxtəlif tədbirlər icmallarla oxucuya təqdim edilir. Təməli 1995-ci ildə qoyulmuş inkişaf proseslərindən bəhs olunan, getdikcə coğrafiyası genişləndirilən belə tədbirlərin qələmə alındığı yazıları dünənə ehtiramın, sabaha cavabdehlik hissinin ifadəsi kimi həm də tarix üçün qısa zaman kəsiyi olan 6 ilin ensiklopediyası da adlandırmaq olar. Bu kitab həm də dəyərli tədqiqat mənbəyidir.
“Şərq qapısı” qəzetinin baş redaktoru, əməkdar jurnalist Mehriban Sultanova, “AZƏRTAC”ın Regional inkişaf və bölgə xəbərləri redaksiyasının müdiri Ceyhun Rüstəmov, Naxçıvan Mətbuat Şurasının sədri Rövşən Hüseynov, “Şərq qapısı” qəzetinin məsul katibi Muxtar Məmmədov kitabla bağlı fikirlərini səsləndiriblər.
Tədbirin sonunda müəllif bildirib ki, muxtar respublikada əldə olunan bütün nailiyyətlər, Vətənə və xalqa xidmətin nümunəsidir. Jurnalistlərin də borcu bu inkişafı tarixiləşdirib gələcək nəsillərə çatdırmaqdır. Rauf Əliyev kitabın nəşrinə göstərilən dövlət qayğısına görə minnətdarlıq edib.
Hafizə Əliyeva