NDU-da “Şərq qapısı” qəzetinin yubiley tədbiri keçirilib - FOTOLAR
NUHÇIXAN İnformasiya Agentliyi xəbər verir ki, Naxçıvan Muxtar Respublikası Ali Məclisi Sədrinin “Şərq qapısı” qəzetinin 100 illik yubileyinin qeyd olunması barədə” 2021-ci il 1 iyun tarixli Sərəncamı ilə təsdiq olunan Tədbirlər planına əsasən Naxçıvan Dövlət Universitetində mətbu orqanın yubiley tədbiri keçirilib.
Tədbir iştirakçıları əvvəlcə universitet əməkdaşlarının və tələbə müəlliflərin yazılarının dərc olduğu “Şərq qapısı” qəzeti nömrələrindən və Naxçıvanda mətbuatın, o cümlədən “Şərq qapısı” qəzetinin tarixi inkişaf yolunu əks etdirən kitablardan ibarət sərgiyə baxıblar.
Tədbirdə çıxış edən universitetin rektoru, dosent Elbrus İsayev bildirib ki, “Şərq qapısı” qəzetinin 100 illik yubileyinin qeyd olunması barədə imzalanan tarixi Sərəncam Naxçıvanın 100 illik tarixinin, mədəniyyətinin, elminin yetirdiyi jurnalistlər nəslinin əməyinə verilən böyük qiymətdir. Muxar respublikada jurnalistika sahəsində kadr potensialının formalaşdırılmasına göstərilən diqqət və qayğının nəticəsidir ki, bu gün 100 yaşlı “Şərq qapısı”nda təcrübəli jurnalistlərlə yanaşı, gənc əməkdaşlar, o cümlədən Naxçıvan Dövlət Universitetinin tələbə jurnalistləri də çalışır.
“Şərq qapısı” qəzetinin baş redaktoru, əməkdar jurnalist Mehriban Sultanova, Mətbuat Şurasının sədri Rövşən Hüseynov, Naxçıvan Dövlət Universitetinin Jurnalistika və xarici ölkələr ədəbiyyatı kafedrasını müdiri, dosent Şəhla Şirəliyeva, Mətbuat və ictimaiyyətlə əlaqələr şöbəsinin müdiri Səadət Əliyeva və “Şərq qapısı” qəzetinin əməkdaşı Güntac Şahməmmədli çıxış edib, qəzetin jurnalist kadrların yetişdirilməsində və milli mətbuatımızın inkişafındakı rolundan söhbət açıblar.
Tədbirdə universitetin Media Mərkəzinin fəaliyyətini əks etdirən videoçarx, “Şərq qapısı” qəzetinin tarixi inkişaf yolu və iş prinsipini əks etdirən slayd nümayiş olunub.
Sonda “Şərq qapısı” qəzetinin baş redaktoru Mehriban Sultanova Naxçıvan Dövlət Universitetinin fəxri fərmanı, eləcə də qəzetin redaksiya heyəti “Şərq qapısı” qəzetinin 100 illik yubileyi və muxtar respublikanın ictimai-siyasi və sosial-iqtisadi həyhatındakı səmərəli fəaliyyəti münasibətilə universitet rəhbərliyinin təşəkkürnaməsi ilə təltif olunublar. Qəzetlə fəal əməkdaşlıq edən universitet əməkdaşları və tələbələrinə isə hədiyyələr təqdim olunub.
Tədbir “Nəqşicahan” instrumental ansamblının konsert proqramı ilə başa çatıb.
Səadət Əliyeva