NDU-da “Fizika və astronomiyanın müasir problemləri” adlı onlayn respublika konfransı keçirilib - FOTOLAR
NUHÇIXAN İnformasiya Agentliyi xəbər verir ki, vebinarda universitetin rektoru Elbrus İsayev elmin müxtəlif sahələrinin kəsişməsində aparılan tədqiqatların səmərəliliyinin artmasına öz töhfəsini verəcək bu cür vebinarların əhəmiyyətindən danışıb. Qeyd edilib ki, ali təhsil ocağında bakalavr üzrə “Fizika” və “Fizika müəllimliyi”, magistratura üzrə “Fizika fənninin tədrisi, metodikası və metodologiyası”, “Yarımkeçiricilər fizikası”, doktorantura üzrə isə “Nəzəri fizika”, “Yarımkeçiricilər fizikası”, “Bərk cisimlər fizikası” ixtisasları üzrə kadr hazırlığı həyata keçirilir. Elbrus İsayev bu ixtisaslar üzrə təhsil alan tələbələrin müvafiq laboratoriyalarda təcrübi dərsləri keçdiklərini deyib, konfransın işinə uğurlar arzulayıb.
“Aerokosmik üsulların ətraf mühitin və zəlzələlərin öyrənilməsində istifadə edilməsi” mövzusunda çıxışında AMEA Geologiya və Geofizika İnstitutu, texnika üzrə elmlər doktoru, professor Fuad Hacızadə uzaqdan aerokosmik, həmçinin hava üsulları və kosmik metodlar barəsində məlumat verib.
AMEA Nəsrəddin Tusi adına Şamaxı Astrofizika Rəsədxanasının icraçı direktoru, professor Nəriman İsmayılovun, Naxçıvan Dövlət Universiteti fizika üzrə fəlsəfə doktoru, dosent Xanəli Həsənovun, AMEA Naxçıvan Bölməsi fizika üzrə fəlsəfə doktoru, dosent Qulu Həziyevin mövzu ilə bağlı çıxışları dinlənilib.
Vebinar iştirakçıları tərəfindən maraqla qarşılanan məruzələrin sonunda mövzu ilə bağlı suallar cavablandırılıb.
Konfransın “Fizikanın aktual problemləri” və “Astronomiyanın müasir problemləri” adlı iki bölmə iclasında Bakı Dövlət Universiteti, AMEA Geologiya və Geofizika İnstitutu, AMEA Naxçıvan Bölməsi Təbii Ehtiyatlar İnstitutu, AMEA Nəsrəddin Tusi adına Şamaxı Astrofizika Rəsədxanası, AMEA-nın Fizika İnstitutu, Azərbaycan Dövlət İqtisad Universiteti, Gəncə Dövlət Universiteti, AMEA Naxçıvan Bölməsi Batabat Astrofizika Rəsədxanasının əməkdaşları elmi mövzularla çıxış ediblər.
Səadət Əliyeva