Naxçıvan Müəllimlər İnstitutunda Tələbə-Gənclər Həftəsinə start verilib - FOTOLAR

NUHÇIXAN İnformasiya Agentliyi xəbər verir ki, Gənclər Həftəsi münasibətilə “Azərbaycan gəncliyi xalqımızın gələcəyidir” mövzusunda keçirilən tədbirdə institutun rektoru Azad Novruzov, Yeni Azərbaycan Partiyası Naxçıvan Şəhər Təşkilatının sədri Elman Cəfərli, Naxçıvan Müəllimlər İnstitutunun humanitar və ictimai fənlər kafedrasının müəllimi  Qorxmaz Hacızadə muxtar respublikamızda gənclərə göstərilən dövlət qayğısından danışıblar. Bildirilib ki, gənclərin ictimai-siyasi, iqtisadi və mədəni həyatda fəal iştirakı gənclərlə iş sahəsində həyata keçirilən tədbirlərin əsasını təşkil edir. Bu diqqət və qayğının əhatəsində  gənclər milli dəyərlərimizə hörmət ruhunda tərbiyə olunur, yeni ideyaların təşəbbüskarı və dövlət idarəçiliyində aparıcı qüvvə kimi formalaşır, idman, elm, mədəniyyət, incəsənət və digər sahələrdə böyük nailiyyətlər əldə edirlər.

Tədbirin davamında institutun tələbələri, Yeni  Azərbaycan Partiyasının gənc üzvləri çıxış edərək təhsil aldıqları elm ocağında gənclərin inkişafı üçün yaradılan şəraitdən danışıblar.

Sonra institutun tələbələrinin hazırladığı ədəbi-bədii kompozisiya nümayiş olunub. Tələbə gənclər şeirlər qiraət edib, milli ruhda mahnılar səsləndiriblər.

Xosrov İbrahimov