Naxçıvan Şahmat Mərkəzində növbəti interaktiv dərs keçirilib - FOTOLAR

Təhsil Nazirliyinin mətbuat xidmətindən NUHÇIXAN İnformasiya Agentliyinə bildirilib ki, dərs ümumtəhsil məktəblərinin şagirdləri üçün saat 11:00-da, ümumtəhsil məktəblərində şahmat fənnini tədris edən müəllimlər üçün saat 12:00-da, Şahmat məktəbləri üçün isə saat 15:00-da baş tutub.

Şagirdlər üçün Beynəlxalq dərəcəli şahmat ustası Emin Hacıyev tərəfindən saat 11:00-da “Yarışlardakı oyunların təhlili” mövzusunda keçirilən interaktiv dərsdə kiçik yaşlı şahmatçılara aid oyunlardakı səhvlər bildirilib, düzgün oynamaq qaydaları göstərilib. Dərs müddəti 45 dəqiqə olub.

Saat 12:00-da  müəllimlər üçün keçirilən seminarda şahmat oyununda kompüter proqramlarından istifadə haqqında məlumat verilib.

Saat 15:00-da Beynəlxalq usta Talıb Babayev tərəfindən şahmat məktəbləri ilə keçirilən interaktiv dərs sonluqlara aid məsələ həlli mövzusunda keçirilibdir.

İnteraktiv dərs muxtar respublikanın 200-dən artıq təhsil müəssisəsində şagird və müəllimlər tərəfindən izlənilib.