Ali təhsil ocağında görkəmli bəstəkar Cahangir Cahangirovun 100 illik yubileyi qeyd olunub - FOTOLAR

NUHÇIXAN İnformasiya Agentliyi xəbər verir ki, Naxçıvan Dövlət Universitetinin İncəsənət fakültəsində Cahangir Cahangirovun 100 illik yubileyinə həsr olunmuş elmi konfrans keçirilib.

Konfransda vurğulanıb ki, Azərbaycanın xalq artisti, görkəmli bəstəkar Cahangir Cahangirov özünəməxsus yaradıcılıq üslubu ilə musiqi mədəniyyəti tarixində böyük iz qoyub. Görkəmli bəstəkar dahi Üzeyir Hacıbəyovdan dərs alıb, xalq musiqi sənətini, muğamlarımızı dərindən öyrənib. Vurğulanıb ki, Avropa və rus klassiklərinin ənənələrini mənimsəyərək, eyni zamanda Azərbaycan klassik opera ənənələrindən bəhrələnən Cahangir Cahangirov öz əsərləri ilə milli opera musiqisini yeni janr və obrazlarla zənginləşdirib. Bəstəkarın yaradıcılığına həsr olunmuş çıxışlar dinlənilib, Cahangir Cahangirovun tələbəsi olmuş Orkestr alətləri və drijorluq kafedrasının dosenti Validə Hüseynova dahi bəstəkardan dərs aldığına görə qürur duyduğunu ifadə edib, onunla bağlı xoş xatirələrini bölüşüb.

Tədbirin bədii hissəsində bəstəkarın “Aylı gecələr”, “Yenilməz batalyon” kinofilmindən “Teymurun mahnısı”, “Dəli Kür” kinofilmindən “Bayatılar”, daha sonra Tələbə teatr studiyasının rəqs qrupu ilə birgə hazırlanan Cahangir Cahangirovun mahnılarından ibarət kompozisiya tamaşaçılar tərəfindən maraqla qarşılanıb.

                                                                                   Etibar Dərbəndəliyev