Azərbaycan dili üzrə keçirilmiş sınaq imtahanının nəticələri açıqlanıb

Dövlət İmtahan Mərkəzi (DİM) Azərbaycan dili (dövlət dili kimi) üzrə dekabrın 26-da keçirilmiş sınaq imtahanının nəticələrini elan edib. Hər bir abituriyent DİM-in internet saytına daxil olaraq imtahan nəticələri və cavab vərəqinin qrafik təsviri ilə tanış ola bilər.

DİM-dən NUHÇIXAN İnformasiya Agentliyinə bildirilib ki, abituriyentlər imtahan nəticələri barədə məlumatı mobil operatorlar (Azercell, Bakcell, Nar, Naxtel) vasitəsilə “iş nömrəsi”ni 7727 nömrəsinə göndərməklə də öyrənə bilərlər.

Sınaq imtahanında iştirak etmək üçün qeydiyyatdan keçmiş 1070 abituriyentdən 82 nəfəri imtahana gəlməyib. Sınaq imtahanı 2020-ci ildə tətbiq edilməsi nəzərdə tutulan və ictimaiyyətə elan edilən, lakin pandemiyaya görə həyata keçirilməsi təxirə salınan imtahan modelinə uyğun keçirilib. İmtahanda abituriyentlərin dinləyib-anlama qabiliyyətləri də yoxlanılıb. Həmçinin yazılı şəkildə cavablandırılması tələb olunan 3 tapşırıqdan istifadə olunub. İmtahanda abituriyentlərə 30 tapşırıq təqdim edilib.

Qeyd edək ki, imtahanda maksimum 100 bal toplamaq mümkündür.