"İlin ən yaxşı universitetinin ən yaxşı rektoru” mükafatı təqdim olunub - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universitetində təşkil edilən mükafatlandırma mərasimində çıxış edən Yeni Azərbaycan Partiyası Naxçıvan Dövlət Universiteti Ərazi İlk Partiya Təşkilatının sədri Arzu Abdullayev ötən ildə universitetin qazandığı uğurları diqqətə çatdırıb və universitetin tanıtım videoçarxı nümayiş olunub.
Qafqazın ən böyük təhsil səhifəsi olan “Azərbaycan Universitetləri” facebook sosial şəbəkə səhifəsinin rəhbəri Zöhrab Süleyman qeyd edib ki, 2011-ci ildən yaradılan səhifə təhsil sahəsi üzrə yenilikləri cəmiyyətə çatdırır. Vurğulanıb ki, səhifə tərəfindən 2013-cü ildən bəri ildə iki dəfə olmaqla keçirilən müsabiqə ali təhsil ocaqları arasında sağlam rəqabət mühitinin formalaşmasına öz müsbət təsirini göstərir. Qeyd edilib ki, budəfəki sorğu bəyənmələrlə yanaşı, universitet və rektor haqqında yazılan müsbət rəylərlə də digərlərindən fərqlənib. 405 mindən çox izləyicisi olan səhifədə 40 faiz səs çoxluğu ilə Naxçıvan Dövlət Universitetinin rektoru Elbrus İsayev qalib seçilib.
Ali təhsil ocağının rektoru Elbrus İsayev qazandığı uğuru universitetin nailiyyəti, ona verilən dəyər kimi səciyyələndirib. Diqqətə çatdırılıb ki, muxtar respublikada elmə, təhsilə göstərilən dövlət qayğısının nəticəsində ali təhsil ocağı müxtəlif yeniliklərə imza atıb, beynəlxalq əməkdaşlıqda uğurlar əldə edib, ikili diplom layihələrinə start verib. 2021-ci ilin ali təhsil ocağı üçün bir sıra mühüm yeniliklərlə yadda qaldığını diqqətə çatdıran rektor bildirilib ki, rəhbərlik etdiyi ali təhsil ocağı dünyanın nüfuzlu universitetlərinin reytinq cədvəlində yer alıb. Naxçıvan Dövlət Universitetində Texnologiya, Atıcılıq mərkəzi, Robototexnika, Kriminalistika və məhkəmə ekspertizası laboratoriyaları, Əczaçılıq Simulyasiya Kabinəsi, Yaşıl Əczaxananın qurulması tələbələrin keçdikləri nəzəri biliklərin daha dərin mənimsənilməsində əhəmiyyətli dərəcədə rol oynayır.
Rektor Azərbaycan Ali Təhsil məkanında ilk olaraq universitetdə qurulan Texnopark layihəsindən də danışıb. Vurğulanıb ki, ötən il də professor-müəllim heyəti nüfuzlu elmi jurnallarda məqalələr nəşr etdirməklə öz elmi potensiallarını nümayiş etdiriblər. Rektor ali təhsil ocağında əcnəbi tələbələrin sayında yüksək artım olduğunu qeyd edərək diqqətə çatdırıb ki, universitetdə 10-a yaxın ölkədən 1500-ə yaxın tələbə təhsil alır. Universitet Televiziyasının müstəqil kanalda muxtar respublika ərazisində yayımına başlanması “Jurnalistika” ixtisasında dərs deyən müəllim və tələbələrin bu sahə üzrə məsuliyyətini daha da artırmaqla bərabər təcrübi bazasının yüksəldilməsinə də öz töhfəsini verib. Qeyd edilib ki, universitetin tərkibində Musiqi Kollecinin yaradılması birgə konsertlərin keçirilməsinə və incəsənət sahəsində təcrübə mübadiləsinə şərait yaradıb. Rektor gündəlik qayğı ilə əhatə olunan universitetin gələcək hədəflərini də diqqətə çatdırıb.
“Azərbaycan universitetləri” facebook sosial şəbəkəsinin rəhbəri Zöhrab Süleyman “İlin ən yaxşı universitetinin ən yaxşı rektoru” plaketini Elbrus İsayevə təqdim edib.
Tədbirdə çıxış edənlər rektoru təbrik edib, ona peşəkar və yorulmaz fəaliyyətində uğurlar arzulayıblar.
Səadət Əliyeva