NDU-nun Tələbə Gənclər Təşkilatı ölkə üzrə “İlin ən yaxşı Tələbə Gənclər Təşkilatı” adını qazanıb - FOTOLAR

Naxçıvan Dövlət Universitetinin Tələbə Gənclər Təşkilatı 2021-ci ildə ölkədə ictimai və sosial əhəmiyyətli, o cümlədən könüllü fəaliyyətin təşkili və bu fəaliyyətin həyata keçirilməsində fəal iştirakına görə “İlin ən yaxşı Tələbə Gənclər Təşkilatı” nominasiyası üzrə mükafata layiq görülüb.

Universitetin Televiziya, mətbuat və ictimaiyyətlə əlaqələr bölməsindən NUHÇIXAN İnformasiya Agentliyinə bildirilib ki, mükafatlandırma Azərbaycan Respublikası Gənclər Fondu və Azərbaycan Tələbə Gənclər Təşkilatları İttifaqının təşkilatçılığı ilə Bakı şəhərində Gənclər Gününə həsr olunmuş Tələbə Gənclər Təşkilatlarının I strateji planlaşdırma forumu çərçivəsində baş tutub.

Qeyd edək ki, Naxçıvan Dövlət Universitetinin tələbə təşkilatlarının fəallığı nəticəsində universitet tələbələri muxtar respublikada, Azərbaycanda keçirilən müsabiqələrdə, olimpiadalarda, sərgilərdə, festivallarda və digər tədbirlərdə fəal iştirak edir və qələbə qazanırlar.