Tofiq Bakıxanova Naxçıvan Dövlət Universitetinin Fəxri doktoru diplomu təqdim edilib - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universiteti Elmi Şurasının iclasında xalq artisti, “Şöhrət” və “Şərəf” ordenli bəstəkar Tofiq Bakıxanova Naxçıvan Dövlət Universitetinin Fəxri doktoru diplomu təqdim edilib.
İclasda universitetin rektoru Elbrus İsayev çıxış edərək Azərbaycanın mötəbər Bakıxanovlar nəslinin nümayəndəsi olan bəstəkarın XX əsrin ortalarında formalaşmağa başlayan çoxşaxəli və məhsuldar yaradıcılığından ətraflı bəhs edib. Bildirilib ki, atası, görkəmli tarzən, muğam bilicisi Əhməd ağa Bakıxanovdan öyrəndiyi muğamlar onun yaradıcılığı üçün əsaslı bünövrə olması ilə yanaşı, görkəmli bəstəkar Qara Qarayevin sinfində musiqinin incəliklərini öyrənməsi onun dünyagörüşünün, yaradıcılıq üslubunun formalaşmasına, professional zirvəyə çatmasına səbəb olub.
Rektor bildirib ki, Tofiq Bakıxanovun həyatında və yaradıcılığında Naxçıvan mühüm yer tutur. Onun qədim diyarımıza olan sevgi və məhəbbəti dəyərli əsərlərində geniş təzahürünü tapıb. Onun zəngin yaradıcılığı və Naxçıvana olan sevgisi muxtar respublika rəhbəri tərəfindən yüksək qiymətləndirilib. Vurğulanıb ki, Naxçıvan Muxtar Respublikası Ali Məclisinin Sədri cənab Vasif Talıbovun sərəncamları ilə bəstəkar Naxçıvan Muxtar Respublikasının Əməkdar incəsənət xadimi fəxri adına layiq görülüb və Tofiq Bakıxanovun 75, 80 və 85 illik yubileyləri, eyni zamanda, Abbasqulu Ağa Bakıxanovun 220 illik yubileyi Naxçıvanda yüksək səviyyədə qeyd olunub. Bütün bunlar Naxçıvan musiqi ictimaiyyətinin Tofiq Bakıxanov yaradıcılığı ilə daha dərindən tanış olmasına şərait yaradıb.
Elmi Şura üzvlərindən Tədris və tərbiyə işləri üzrə prorektor Rafiq Rəhimov, Naxçıvan Musiqi Kollecinin direktoru, əməkdar müəllim Məhəbbət Babayeva, universitetin Musiqi nəzəriyyəsi və tarixi kafedrasının müdiri, sənətşünaslıq üzrə elmlər doktoru, əməkdar müəllim İnara Məhərrəmova, İncəsənət fakültəsinin dekanı, Naxçıvan Muxtar Respublikasının Əməkdar rəssamı Cavid İsmayılov çıxış edərək təklifi yüksək dəyərləndiriblər. Çıxış edənlər musiqi mədəniyyəti tarixində və inkişafında özünəməxsus xidmətləri olan görkəmli bəstəkarın muxtar respublikanın tərənnümünə həsr edilən yaradıcılığından, onun gözəl pedaqoq və əsl insani xüsusiyyətlərindən bəhs ediblər. Çıxışlarda, həmçinin qeyd olunub ki, bəstəkar dəfələrlə universitetin Konservatoriyasında, Naxçıvan Musiqi Kollecində, eləcə də musiqi məktəblərində ustad dərsləri keçib, dəyərli məsləhətlərini verərək tələbələrin ifasında təşkil olunan konsertlərin dinləyicisi olub.
Rektor xalq artisti, “Şöhrət” və “Şərəf” ordenli bəstəkar Tofiq Bakıxanova universitetin Fəxri doktoru diplomu və mantiyasını təqdim edib.
Tofiq Bakıxanov yaradıcılığında özünəməxsus yer tutan Naxçıvanla bağlı xoş xatirələrini paylaşıb, qədim diyarımıza dərin məhəbbətini ifadə edib.
Səadət Əliyeva