Azərbaycan Respublikasının Xalq artisti, “Şöhrət” və “Şərəf” ordenli bəstəkar Tofiq Bakıxanovun 90 illik yubileyi fəxri doktoru olduğu ali təhsil ocağında qeyd edilib - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universitetində görkəmli bəstəkar, xalq artisti, əməkdar incəsənət xadimi, Azərbaycan Respublikası Prezidentinin fərdi təqaüdçüsü, Naxçıvan Muxtar Respublikasının Əməkdar incəsənət xadimi, “Şöhrət” və “Şərəf” ordenli, professor Tofiq Bakıxanovun yubileyinə həsr olunmuş konsert proqramı təşkil olunub.
Bu münasibətlə keçirilən tədbirdə universitetin rektoru Elbrus İsayev bəstəkarın həyat və yaradıcılığından bəhs edib. Qeyd edilib ki, Naxçıvan Muxtar Respublikası Ali Məclisinin Sədrinin sərəncamları ilə bəstəkar Naxçıvan Muxtar Respublikasının Əməkdar incəsənət xadimi fəxri adına layiq görülüb və Tofiq Bakıxanovun 75, 80 və 85 illik yubileyləri, eyni zamanda bəstəkarın ulu babası Abbasqulu ağa Bakıxanovun 220 illik yubileyi Naxçıvanda yüksək səviyyədə qeyd edilib. Rektor bəstəkarı yubileyi və yaradıcılıq fəaliyyətinn 70 illiyi münasibətilə təbrik edib, ona cansağlığı, yaradıcılıq uğurları arzulayıb, universitetin fəxri fərmanını və İncəsənət fakültəsinin dekanı, əməkdar rəssam Cavid İsmayılovun çəkdiyi portreti Tofiq Bakıxanova təqdim edib.
Naxçıvan Muxtar Respublikası Bəstəkarlar Təşkilatının sədri, Əməkdar incəsənət xadimi, Musiqinin tarixi və nəzəriyyəsi kafedrasının baş müəllimi Yaşar Xəlilov, Musiqinin tarixi və nəzəriyyəsi kafedrasının dosenti, sənətşünaslıq üzrə fəlsəfə doktoru, Azərbaycan Bəstəkarlar İttifaqının üzvü Günay Məmmədova çıxışlarında Tofiq Bakıxanovun həyat və yaradıcılığında Naxçıvana olan məhəbbətini xüsusi qeyd edib.
Xalq artisti, əməkdar incəsənət xadimi, Naxçıvan Muxtar Respublikasının Əməkdar incəsənət xadimi, “Şöhrət” və “Şərəf” ordenli, professor Tofiq Bakıxanov göstərilən yüksək diqqət və qayğıya görə Naxçıvan Muxtar Respublikası Ali Məclisinin Sədri Vasif Talıbova dərin minnətdarlığını bildirib,tədbirin təşkilatçılarına təşəkkür edib.
Tədbirin bədii hissəsində Tofiq Bakıxanovun əsərlərindən ibarət konsert proqramı təqdim edilib. Beynəlxalq müsabiqələr laureatı Sevinc Kərimovanın müşayiəti ilə Azərbaycan Respublikasının Əməkdar artisti, Beynəlxalq müsabiqələr və Tərəqqi medalı laureatı, dosent Sahib Paşazadə tarda ifası ilə tamaşaçılara xoş ovqat bəxş edib.
Konsertdə “Türk rapsodiyası”, “Görüş yerimiz”, “Xeyir və Şər” baletindən “Qəhrəmanın çalışması”, “Şərqdən gələn sədalar” məcmuəsindən “Səhər quşu”, “Solmuş qərənfil”, “Sevməyir, qoy sevməsin”, “Şərq poeması” baletindən “Qızlar rəqsi”, “Xeyir və Şər” baletindən rəqs, “Xatirə konserti” musiqiləri ifa edilib.
Sonda xatirə şəkli çəkdirilib.
Səadət Əliyeva