AMEA Naxçıvan Bölməsi Tarix, Etnoqrafiya və Arxeologiya İnstitutunun böyük elmi işçisi, tarix üzrə fəlsəfə doktoru Aytəkin Qəhrəmanovanın 60 illik yubileyi qeyd olunub - FOTOLAR

Bu münasibətlə keçirilən tədbirdə bölmənin sədri, akademik İsmayıl Hacıyev qeyd edib ki, Aytəkin Qəhrəmanovanın fəaliyyətində Azərbaycan ədəbiyyatının görkəmli nümayəndəsi, yazıçı, dramaturq Cəlil Məmmədquluzadə yaradıcılığının geniş şəkildə araşdırılması əsas yer tutur. Alim görkəmli ədibin yaradıcılığında təsvir edilən adətləri, sənətkarlıq sahələrini, təsərrüfat həyatı məsələlərini etnoqrafik baxımdan tədqiqata cəlb edib. Eyni zamanda xalq arasında qorunub saxlanılmış adət və inamları sistemləşdirmək məqsədilə sorğular aparıb. Ərsəyə gətirdiyi hər bir elmi əsəri qədim adət-ənənələrimiz barədə geniş məlumat verməyə imkan yaradıb.

“Cəlil Məmmədquluzadənin “Anamın kitabı”nda ailə”, “Cəlil Məmmədquluzadə yaradıcılığında nikah münasibətləri”, “Cəlil Məmmədquluzadənin “Meyit busatı”nda heyvandarlığın ənənəvi xüsusiyyətlərinə dair”, “Müstəqillik illərində Naxçıvan kəndlərində müasir ailə tipləri” adlı tədqiqat əsərləri alimin ciddi müşahidə və axtarışlarının məhsuludur.

İsmayıl Hacıyev Aytəkin Qəhrəmanovaya 60 illik yubileyi münasibətilə  təbriklərini çatdırıb,  ona fəxri fərman təqdim edib.

Bölmənin Tarix, Etnoqrafiya və Arxeologiya İnstitutunun şöbə müdiri, tarix üzrə fəlsəfə doktoru Asəf Orucov qeyd edib ki, Aytəkin Qəhrəmanova 1962-ci ildə Şahbuz rayonunda anadan olub. O, 1980-ci ildə Azərbaycan Dövlət Universitetinin kitabxanaçılıq və biblioqrafiya fakültəsinə daxil olub. Universiteti bitirdikdən sonra müxtəlif vəzifələrdə çalışan Aytəkin Qəhrəmanova 2011-ci ildən 2019-cu ilədək Naxçıvan Muxtar Respublika Kitabxanasının direktoru vəzifəsində çalışıb, muxtar respublikada kitabxana işinə öz töhfəsini verib. Aytəkin Qəhrəmanovanın pedaqoji fəaliyyətlə də məşğul olduğunu diqqətə çatdıran Asəf Orucov bildirib ki, alim 2019-cu ildən AMEA Naxçıvan Bölməsində fəaliyyətini davam etdirir. O, 30-dan artıq elmi məqalə və 1 monoqrafiyanın müəllifidir. 

İnstitutun direktoru, AMEA-nın müxbir üzvü, professor Hacıfəxrəddin Səfərli, institutun şöbə müdiri, tarix üzrə fəlsəfə doktoru Zeynəb Quliyeva da Aytəkin Qəhrəmanovanı təbrik ediblər.  

Aytəkin Qəhrəmanova göstərilən diqqət və qayğıya görə minnətdarlığını bildirib.

Mədinə Rəhimli