Naxçıvan Musiqi Kollecində kitab təqdimatı olub - FOTOLAR
NUHÇIXAN İnformasiya Agentliyi xəbər verir ki, Naxçıvan Musiqi Kollecinin direktoru, Naxçıvan Muxtar Respublikasının Əməkdar müəllimi Məhəbbət Babayeva, kollecin Xalq Çalğı alətləri şöbəsinin qanun müəllimi, musiqi tənqidçisi, Prezident mükafatçısı Sevinc Babayevanın həmmüəllifi olduğu 2 hissəli “Rus musiqi ədəbiyyatı” kitabının və Bakı Musiqi Akademiyası tərəfindən Naxçıvan Musiqi Kollecinə hədiyyə olunan kitabların təqdimatı olub.
Təqdimat zamanı Naxçıvan Dövlət Universitetinin rektoru Elbrus İsayev istedadlı gənclərin aşkara çıxarılaraq ali təhsilə cəlb olunması, xalqımıza məxsus musiqi ənənələrinin yaradılmasında, mahnılarımızın, eləcə də klassik musiqinin təbliği və öyrənilməsi sahəsində kollecin təqdirəlayiq fəaliyyətindən söz açıb. Vurğulanıb ki, kollecin kitabxanası da bu sahədə öz üzərinə düşən məsuliyyəti dərk edir və layiqincə yerinə yetirir. Rektor kitabların çap olunmasına, ərsəyə gəlməsinə görə müəllifləri təbrik edib.
Kollecin kitabxana müdiri İlhamə Kazımova çıxışı zamanı bildirib ki, hal-hazırda kitabxananın fondunda 7672 sayda çap məhsulu var ki, bunlardan 2965-i bədii ədəbiyyat nümunəsidir. Qeyd edilib ki, kollecin kitabxanası ixtisaslaşmış kitabxana olduğu üçün burada bədii ədəbiyyatla yanaşı musiqi ədəbiyyatı və not əsərləri çoxluq təşkil edir.
Kollecin Tədris və tərbiyə işləri üzrə direktor müavini Elman Əliyev təqdimatı keçirilən və oxucu üçün yorucu olmayan bu kitablarda not nümunələrinin də tam mənası ilə anlaşıqlı şəkildə qeyd edildiyini deyib. Vurğulanıb ki, hər iki müəllifin zəhməti nəticəsində ərsəyə gələn kitablar diqqətəlayiqdir və Azərbaycan dilində musiqi mədəniyyəti haqqında ədəbiyyat külliyatına əvəzolunmaz töhfədir.
Bildirilib ki, kitabda diqqət çəkən məqamlardan biri də ayrı-ayrı musiqi cərəyanları, onların formalaşması və bu prosesə təsir göstərən amillərin işıqlandırılmasıdır.
Sonda müəlliflər təbriklərə və xoş sözlərə görə minnətdarlıqlarını ifadə ediblər.
Qeyd edək ki, hər iki kitab orta və ali ixtisas təhsil pilləsi üçün nəzərdə tutulub.
Məmmədbağır Dünyamalıyev