Beynəlxalq Qadınlar Günü NDU-da qeyd edilib - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universitetində 8 Mart - Beynəlxalq Qadınlar Günü münasibətilə tədbir keçirilib.
Tədbirdən öncə universitetin Pedaqoji və İncəsənət fakültələrinin müəllim və tələbələrinin əl işlərindən ibarət sərgiyə baxış olub. Sərgidə vitraj sənəti, xalça və tikmə nümunələri, muncuqla hazırlanmış əl işləri və rəsm əsərləri yer alıb. Müəllim və tələbələrin kətan üzərində yağlı boya, kağız üzərində sulu boya, dekorativ tətbiqi sənətə aid gips və şüşə üzərində işlər, təbii daşlardan aksesuarlar və digər əl işləri diqqəti cəlb edib.
Sərgi ilə tanışlıqdan sonra davam etdirilən tədbirdə Naxçıvan Dövlət Universitetinin rektoru Elbrus İsayev qeyd edib ki, Naxçıvan Muxtar Respublikasında qadınların cəmiyyətin ictimai-siyasi həyatında rolu getdikcə artır. Bu, bir tərəfdən Naxçıvanda qadın fəallığı sahəsində çoxəsrlik tarixə söykənən zəngin ənənələr, digər tərəfdən isə muxtar respublikada həyata keçirilən dövlət-qadın siyasəti ilə bağlıdır.
Elbrus İsayev cəmiyyətdə bütün istiqamətlərdə olduğu kimi universitetin qadın əməkdaşlarının da elm, təhsil sahəsində fəallığını qeyd edərək bildirib ki, universitetdə fəaliyyət göstərən 401 qadın əməkdaşın 4-ü elmlər doktoru, 3-ü professor, 40-ı dosent, 60-ı fəlsəfə doktoru, 201-i isə müəllimdir. Onlardan 10 nəfəri Azərbaycan Respublikasının, 8 nəfəri isə Naxçıvan Muxtar Respublikasının fəxri adlarına layiq görülüb. Diqqətə çatdırılıb ki, ali təhsil ocağında nüfuzlu nəşrlərdə elmi məqalələri dərc olunan müəllimlər sırasında da qadın müəllimlərimiz xüsusilə seçilirlər.
Elbrus İsayev əlamətdar gün münasibətilə universitetin qadın əməkdaşlarını təbrik edib və işlərində uğurlar arzulayıb.
Təsviri incəsənət kafedrasının müəllimi Səyyarə Sadıxovaya sənətşünaslıq üzrə fəlsəfə doktoru, Pedoqogika və psixologiya kafedrasının baş müəllimi Solmaz Cabbarovaya pedaqogika üzrə fəlsəfə doktoru diplomları və hədiyyələr təqdim olunub.
Tədbirin bədii hissəsində “Xalq çalğı alətləri” kafedrasının baş müəllimi Sərxan Abdullayevin bədii rəhbərliyi ilə “Buta” instrumental ansamblının və Musiqi Kollecinin müəllim və tələbələrinin ifasında konsert proqramı təqdim olunub.
Universitetin Tələbə Teatr Studiyasının “Təbrik” adlı pantomim tamaşası alqışlarla qarşılanıb.
Sonda rektor Elbrus İsayev iştirakçıları təbrik edərək onlara hədiyyələr təqdim edib.
Fəxriyyə Səyyadova