“Naxtel” gələcəyin mütəxəssislərini yetişdirir - FOTOLAR
“Naxtel 4G” mobil rabitə xidmətləri ilə yanaşı, gələcək mütəxəssislərin yetişdirilməsinə də öz töhfəsini verir. Şirkət tərəfindən ötən ildən təşkil olunan təkmilləşdirici dərslər bu il də davam etdirilir.
NUHÇIXAN İnformasiya Agentliyi xəbər verir ki, dərslərdə Naxçıvan Dövlət Universiteti və “Naxçıvan” Universitetində informasiya texnologiyaları sahəsi üzrə müvafiq ixtisaslarda təhsil alan tələbələr iştirak edir.
Dərslərdə tələbələrə “Naxtel” Məhdud Məsuliyyətli Cəmiyyətinin İT və Billing şöbəsinin peşəkar mütəxəssisləri tərəfindən “Oracle” və “SQL” proqramlarının fundamental hissələri tədris olunur. İnformasiya texnologiyaları sahəsi üzrə yetişən mütəxəssislərin biliklərinin təkmilləşdirilməsi məqsədilə keçirilən dərslərə tələbələrin marağı böyükdür.
Qeyd edək ki, kursun müddəti 60 gündür. Kursu bitirən tələbələr üçün imtahan təşkil olunacaq. İmtahanı uğurla başa vuran gənclər “Naxtel” şirkəti tərəfindən sertifikatla təmin olunacaqlar.
Aygün Hüseynova