Ali təhsil ocağında “Bir gün tələbə” layihəsi başa çatıb - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universitetində keçirilən “Bir gün tələbə” layihəsi başa çatıb.
Ali təhsil ocağının Beynəlxalq münasibətlər və hüquq fakültəsinin akt zalında keçirilən açılış tədbirində əvvəlcə universitetin tanıtım və ötən il həyata keçirilən eyniadlı layihənin videoçarxlarına baxış olub.
Universitetin rektoru Elbrus İsayev ötən ildən etibarən keçirilən layihənin uğurlu icrasından danışıb. Bildirib ki, məqsədi şagirdlərin universitet mühiti, tələbə həyatı ilə tanış olması, həmçinin ali təhsil müəssisəsinə qəbul prosesi dövründə tələbələrdə ruh yüksəkliyi yaratmaqdır. Rektor universitetin beynəlxalq əlaqələri, həyata keçirilən startap, ikili diplom layihələrindən bəhs edib, universitet ərazisində istifadəyə veriləcək texnopark barədə məktəblilərə məlumat verib. Elbrus İsayev məktəbliləri qarşıdan gələn Novruz bayramı münasibətilə təbrik edib, onlara təhsil həyatında uğurlar arzulayıb.
Universitetin Tələbə Gənclər Təşkilatının sədri Əziz Qasımov qeyd edib ki, bu il ikincisi təşkil olunun layihə şagirdlərin gələcək karyeraları barədə düşüncələrinə mühüm özünəməxsus təsir göstərir.
Naxçıvan Şəhər Təhsil şöbəsinin baş məsləhətçisi Gülxanım Orucova çıxışı zamanı təhsili, dünyagörüşü ilə fərqlənən şagirdləri nümunə göstərib, gələcəkdə onların sırasından peşəkar müəllimlərin, həkimlərin, pedaqoqların, mühəndis və digər peşə sahiblərinin çıxacağına əminliyini bildirib.
Baytarlıq ixtisası üzrə I kurs tələbəsi Əzizə Məmmədova ötən il baş tutan “Bir gün tələbə” layihəsində iştirak etdiyini və ona ixtisas seçimində bu layihənin dəstək olduğunu bildirib.
Naxçıvan şəhər 14 nömrəli tam orta məktəbin XI sinif şagirdi Ayşən Qəribli məktəblilər adından layihə təşkilatçılarına minnətdarlığını bildirib.
Sonra məktəblilər Naxçıvan Dövlət Universitetinin ayrı-ayrı fakültə, mərkəz, bölmə, kabinə və laboratoriyalarını gəzib, ali təhsil və tədqiqat mühiti ilə tanış olublar.
Sonda anket sorğuda iştirak edən məktəblilər universitetdən xoş təəssüratlarla ayrılıblar.
Məmmədbağır Dünyamalıyev