Hüseyn Cavidin Ev Muzeyində Beynəlxalq Poeziya Günü qeyd edilib
NUHÇIXAN İnformasiya Agentliyi xəbər verir ki, böyük filosof-şair, dramaturq Hüseyn Cavidin Ev Muzeyində Beynəlxalq Poeziya Günü münasibətilə tədbir keçirilib.
Tədbirdə Naxçıvan Muxtar Respublikası mədəniyyət nazirinin müavini Həsən Kərimov çıxış edərək bildirib ki, 1999-cu ildə YUNESKO-nun 30-cu iclasında 21 mart tarixi Beynəlxalq Poeziya Günü elan olunub. Azərbaycanda isə Beynəlxalq Poeziya Günü 2007-ci ildən etibarən qeyd olunur. Məqsəd poeziya sənətini təbliğ etmək, şeiri insanlara sevdirmək, xalqları ədəbiyyatın bu janrı ilə bir-birinə yaxınlaşdırmaqdır.
Həsən Kərimov ədəbiyyatın ən böyük amalını və tarixi missiyasını mənsub olduğu xalqa xidmətdə görən xalqımızın ümummilli lideri Heydər Əliyevin ölkəmizə rəhbərlik etdiyi bütün dövrlərdə Azərbaycan ədəbiyyatının inkişafı üçün həyata keçirdiyi tədbirlərdən söz açıb. Vurğulanıb ki, muxtar respublikamızda da poeziya sənətinin inkişafına böyük qayğı göstərilir, Naxçıvanda yaşayıb-yaradan şair və yazıçıların yaradıcılığı yüksək qiymətləndirilir. Qədim diyarımızda görkəmli şairlərin yubileyləri dövlət səviyyəsində qeyd olunur, orden və medallara, Azərbaycan Respublikası Prezidentinin fərdi təqaüdünə, Prezident mükafatına layiq görülürlər. Hər il böyük romantik şairimiz Hüseyn Cavidin anadan olduğu gün Naxçıvanda “Hüseyn Cavid Poeziya Günü” keçirilir.
Vurğulanıb ki, Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamı ilə təsdiq olunmuş “Oxunması zəruri olan kitabların siyahısı”nda Azərbaycan və dünya ədəbiyyatının da klassik poeziya nümunələri vardır. Bu Sərəncam mütaliə ilə yanaşı, gözəl poeziya nümunələrinin təbliği üçün də geniş imkanlar açır.
Naxçıvan Muxtar Respublikası Yazıçılar Birliyinin sədri, Əməkdar mədəniyyət işçisi Asim Əliyev “Dünyanın söz sənəti günü”, AMEA Naxçıvan Bölməsinin İncəsənət, Dil və Ədəbiyyat İnstitutunun icraçı direktoru, filologiya üzrə fəlsəfə doktoru, dosent Elxan Məmmədov “Poeziya: fikirlərlə bəzədilən söz sarayı” mövzularında çıxış ediblər.
Cəlil Məmmədquluzadə adına Naxçıvan Dövlət Musiqili Dram Teatrının aktyorları milli və dünya ədəbiyyatından şeirləri bədii qiraət ediblər.
Sonda muzeyin ekspozisiyasına baxış olub.
Adilə Səfərova