Naxçıvan Dövlət Universitetində Beynəlxalq Poeziya Günü qeyd edilib - FOTOLAR

NUHÇIXAN İnformasiya Agentliyi xəbər verir ki, Beynəlxalq Poeziya Günü ilə əlaqədar Naxçıvan Dövlət Universiteti Elmi Kitabxanasında "Heydərbabadan haray salıb sənə ömür salaq" adlı ədəbi-bədii gecə təşkil olunub. Universitetin rektoru Elbrus İsayev bildirib ki, poeziya sənətini təbliğ etmək, şeiri insanlara sevdirmək, xalqları ədəbiyyatın bu janrı ilə bir-birinə yaxınlaşdırmaq məqsədini daşıyan tarixi gün Azərbaycanda 2007-ci ildən etibarən qeyd olunur. Rektor muxtar respublikada da poeziyaya, şeir, sənət adamlarına göstərilən dövlət qayğısından danışaraq bildirib ki, Azərbaycan ədəbiyyatının çoxəsrlik inkişaf tarixində Naxçıvan ədəbi mühitinin özünəməxsus yeri var. İstər ədəbi-bədii yaradıcılıq, istərsə də elmi–tədqiqat sahəsində Naxçıvanlı qələm sahibləri həmişə öz sözlərini deyib, ədəbiyyatşünaslığımıza layiqli töhfələr veriblər. 

Fərqli formatda təqdim olunan tədbirdə iştirakçılar M.H. Şəhriyarın “Heydərbabaya salam” poemasını bədii qiraət ediblər. Ali təhsil ocağının əcnəbi tələbələrinin də şairin şeirlərini bədii qiraət etməsi tədbirə əlavə rəng qatıb. Ədəbi-bədii gecədə, həmçinin Naxçıvan Radiosunun əməkdaşı, şair-jurnalist Təranə Arifqızı Şəhriyarsayağı yazdığı “Təndir çörəyi” şeirini səsləndirib. 

Sonda M.H.Şəhriyarın keşməkeşli həyatını özündə əks etdirən videoçarx tədbir iştirakçılarında yaddaqalan təəssürat oyadıb. 

Səadət Əliyeva