Əməkdar müəllimin yubileyi qeyd edilib - FOTOLAR
Naxçıvan Musiqi Kollecinin direktoru, Naxçıvan Muxtar Respublikasının Əməkdar müəllimi Məhəbbət Babayevanın 50 illik yubileyi qeyd edilib.
NUHÇIXAN İnformasiya Agentliyi xəbər verir ki, bununla bağlı Naxçıvan Musiqi Kollecində keçirilən tədbirdə Naxçıvan Dövlət Universitetinin rektoru Elbrus İsayev Naxçıvanın mədəni həyatında fəallığı ilə seçilən Məhəbbət Babayevanın yetişdirdiyi tələbələrin respublika və beynəlxalq səviyyəli müsabiqələrdə qazandıqları uğurlardan danışıb. Yubilyarı təbrik edən rektor universitetin fəxri fərmanını və İncəsənət fakültəsi adından rəsm tablosunu ona təqdim edib.
Tədbirdə digər çıxış edənlər də 20-yə yaxın elmi məqalənin, “Musiqi və onun tədrisi metodikası” fənn proqramı, konfrans materialları, tezislərin, “Xarici ölkələrin musiqi ədəbiyyatı”, “Rus musiqi ədəbiyyatı” kitablarının müəllifi olan Məhəbbət Babayevanı təbrik edib, ünvanına xoş sözlər deyiblər.
Sonda yubilyar tədbirin təşkilinə və təbriklərə görə minnətdarlığını bildirib.
Qeyd edək ki, Məhəbbət Babayeva 2015-ci ildə “Naxçıvan Muxtar Respublikasının Əməkdar müəllimi” fəxri adına layiq görülüb.
Məmmədbağır Dünyamalıyev