NDU-da bədii yaradıcılıq festivalı keçirilib - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universitetində ümummilli lider Heydər Əliyevin anadan olmasının 99-cu ildönümünə həsr olunmuş bədii yaradıcılıq festivalı keçirilib.
Bu məqsədlə Naxçıvan Dövlət Universitetində keçirilən tədbirdə universitetin rektoru Elbrus İsayev çıxış edərək qonaqları salamlayıb, ədəbiyyat və incəsənətin birgə vəhdətindən ərsəyə gələn tədbiri yüksək qiymətləndirib.
Qeyd edilib ki, müsabiqədə musiqi və incəsənət sahələri üzrə qabiliyyəti olan qeyri-ixtisas tələbələri iştirak edirlər. Elbrus İsayev universitetin professor-müəllim heyəti və tələbələri üçün gözəl xatirələrlə yadda qalacaq görüşdən hər kəsin faydalanacağına əminliyini ifadə edib.
Müsabiqədə iştirak edən onlarla istedadlı tələbə şeir, musiqi, bədii qiraət və rəsm üzrə öz bacarıqlarını nümayiş etdiriblər.
Qaliblərin müəyyən edilməsi münsiflər heyətinin sədri, Azərbaycan Milli Konservatoriyasının müəllimi, Xalq artisti Mübariz Tağıyev, münsiflər heyətinin üzvləri Bakı Xoreoqrafiya Akademiyasının prorektoru, Xalq artisti Təranə Muradova, Azərbaycan Respublikasının Əməkdar incəsənət xadimi Baba Vəziroğlu, Azərbaycan Dövlət Akademik Opera və Balet Teatrının solisti, Xalq artisti Samir Cəfərov, Azərbaycan Respublikası Təhsil Nazirliyinin Məktəbdənkənar fəaliyyətin təşkili şöbəsinin baş məsləhətçisi Maral Salmanova tərəfindən həyata keçirilib.
Müsabiqənin sonunda münsiflər heyəti təklif və tövsiyələrini verib, tələbələrə uğurlar arzulayıblar.
Qeyd edək ki, festival qaliblərinin yekun konserti may ayında keçiriləcək. Qaliblər Azərbaycan Respublikası Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin Rəyasət Heyətinin diplom və hədiyyələri ilə mükafatlandırılacaqlar.
Görüşdən sonra qonaqlar universitet ərazisini gəzib, mövcud fakültələrlə tanış olublar. İncəsənət fakültəsinin sərgi salonunda müəllim və tələbələrin əl işlərindən ibarət sərgi onlarda xüsusi təəssürat yaradıb.
Sonra ali təhsil ocağının Magistratura mərkəzində Azərbaycan Respublikasının Əməkdar incəsənət xadimi Baba Vəziroğlu ilə görüş keçirilib. Rektor nasir, şair, tərcüməçi, kinodramaturq, Azərbaycan Yazıçılar Birliyinin üzvü Baba Vəziroğlu yaradıcılığı barədə məlumat verib, görüşü gənclər üçün əlamətdar hadisə kimi dəyərləndirib.
Görkəmli şair şeirlərinə bəstələnən mahnılardan ibarət albomu Elbrus İsayevə hədiyyə edib.
Diskussiya şəklində davam edən görüşdə müəllim və tələbələr Baba Vəziroğluna maraqlı suallar ünvanlayıblar. Şairin öz şeirlərini bədii qiraət etməsi iştirakçılarda xüsusilə maraq oyadıb.
Görüşdə şairə kitab və hədiyyələr təqdim edilib.
Xalq artistləri Azərbaycan Milli Konservatoriyasının müəllimi Mübariz Tağıyev, Bakı Xoreoqrafiya Akademiyasının prorektoru Təranə Muradova isə incəsənət istiqaməti üzrə təhsil alan tələbələrlə görüşüblər. Görüşdə tələbələrin musiqi bacarıqları, gənclərin retro musiqisinə olan marağı qiymətləndirilib. Xalq artisti Mübariz Tağıyev tələbələrin istəyi ilə unudulmaz mahnılarından bir neçəsini səsləndirib.
Milli rəqslərimiz, xüsusilə yallılar və milli geyimlərimiz barədə tələbələrlə söhbət aparan Təranə Muradova milli rəqslərimizdən nümunələr təqdim edib.
Azərbaycan Respublikası Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin Rəyasət Heyətinin qərarı ilə ali, orta və ilk peşə ixtisas təhsili müəssisələrinin tələbələri arasında keçirilən festival milli vətənpərvərlik, mədəniyyətimizə, incəsənətimizə, milli adət-ənənələrimizə hörməti inkişaf etdirmək məqsədi daşıyır.
Səadət Əliyeva