Naxçıvanda məktəbəqədər təhsil müəssisələrinə - bağçalara işə qəbul üçün müsabiqə elan edilib
Naxçıvan Muxtar Respublikası Dövlət İmtahan Mərkəzinin mətbuat xidmətindən NUHÇIXAN İnformasiya Agentliyinə verilən məlumata görə, Dövlət İmtahan Mərkəzi tərəfindən elan olunan müsabiqədə iştirak etmək istəyən şəxslər 13 aprel-13 may 2022-ci il tarixlərdə Naxçıvan Muxtar Respublikası Dövlət İmtahan Mərkəzinin internet portalında (www.dim.nmr.az) “şəxsi kabinet” bölməsinə daxil olaraq elektron müraciət formasını doldurmaqla qeydiyyatdan keçməlidirlər.
Namizədlər test imtahanında iştirak üçün 90 manat məbləği “şəxsi kabinet” vasitəsilə bank kartları ilə ödəyə bilərlər. Digər halda həmin məbləği Dövlət İmtahan Mərkəzinin “Naxçıvanbank” ASC-dəki bank hesabına ödəyib ödənişə dair qəbzi Dövlət İmtahan Mərkəzinə təqdim etməlidirlər.
Ümumilikdə 43 vakant vəzifənin çıxarıldığı müsabiqədə namizədlər bir neçə vakant vəzifənin tutulması üçün müraciət edə bilərlər. Elektron müraciət forması doldurularkən iddia olunan vakant vəzifələrin tutulma şərtləri nəzərə alınmalıdır.
Test imtahanında uğur qazanmış musiqi rəhbərlərinin fortepianoda ifa bacarıqları da yoxlanılacaqdır. Qeydiyyatdan keçməkdə çətinlik çəkən namizədlər Dövlət İmtahan Mərkəzinə müraciət edə bilərlər.
Vakant vəzifələrin siyahısı, təhsilə dair tələblər və vəzifə təlimatları ilə bu link vasitəsilə tanış olmaq olar.
Maraqlananlar Dövlət İmtahan Mərkəzinin (036) 545-65-71 nömrəli əlaqə telefonu və ya [email protected] elektron poçt ünvanı vasitəsilə ətraflı məlumat əldə edə bilər.