Gənc rəssamın fərdi sərgisi xüsusi maraqla qarşılanıb - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universiteti İncəsənət fakültəsində Təsviri incəsənət müəllimliyi ixtisası üzrə III kurs tələbəsi Fərqanə Seyidovanın heykəltaraşlıq nümunələrindən ibarət fərdi sərgisi təşkil olunub. Sərgidə çıxış edən universitetin rektoru Elbrus İsayev fakültədə ənənə halını alan sərgilərin hətta universitetə səfər edən qonaqların da xüsusi marağına səbəb olduğunu diqqətə çatdırıb. Bildirilib ki, fakültədə artıq heykəltaraşlıq üzrə peşəkar komandanın formalaşmağının nəticəsidir ki, ali təhsil ocağında müəllimlərin sərgisi ilə bərabər bu ixtisasda təhsil alan tələbələrin də fərdi bacarıqları nümayiş olunur. Rektor gənc istedad sahibini qazandığı uğurları münasibətilə təbrik edib və sərgidə fəal iştirakına görə universitetin sertifikatını təqdim edib.
Fakültənin dekanı, Naxçıvan Muxtar Respublikasının Əməkdar rəssamı Cavid İsmayılov xüsusi qabiliyyəti və istedadı ilə seçilən gənc rəssam haqqında danışaraq qeyd edib ki, Naxçıvan Muxtar Respublikası Rəssamlar Birliyinin Gənc Rəssamlar Bölməsinin və Gənc rəssamlar klubunun üzvü olan Fərqanə Seyidova 2020-ci ildə xususi istedadına görə “İlin gənc rəssamı” nominasiyasına görə təltif edilib.
Təsviri incəsənət kafedrasının professoru, Xalq rəssamı Hüseynqulu Əliyev, həmin kafedranın müəllimi, Naxçıvan Muxtar Respublikasının Əməkdar incəsənət xadimi Elman Cəfərov öz çıxışlarında qeyd ediblər ki, universitetdə keçirilən bütün sərgilərdə iştirak edən və uğurları ilə hər zaman seçilən Fərqanə Seyidova yaradıcılığının müxtəlif dövrlərində müxtəlif adda fəxri fərman və diplomlara layiq görülüb.
Təsviri incəsənət kafedrasının müdiri Siddiqə Hacıyeva gənc istedadın dəzgah heykəltaraşlıq, monumental-dekorativ, dekorativ heykəltaraşlıq növlərində olan əsərlərini xüsusi bacarıqla ortaya çıxardığını qeyd edib.
Sonda Fərqanə Seyidova ona verilən dəstək və yaradıcılığının qiymətləndirilməsi üçün göstərilən xüsusi qayğıya görə öz minnətdarlığını ifadə edib.
Qeyd edək ki, sərgidə rəssam-heykəltaraşın 30-dan artıq heykəltaraşlıq əsəri nümayiş olunub. Bundan başqa gənc rəssamın yağlı, sulu boya ilə işlənmiş rəngkarlıq nümunələri, qrafik işləri, dekorativ tətbiqi sənət əsərləri də sərgilənib.
Səadət Əliyeva
NDU-nun Televiziya, mətbuat və ictimaiyyətlə əlaqələr bölməsinin müdiri