Türk Ağsaqqalları Birliyinin nümayəndə heyəti Naxçıvana səfər edib - VİDEO
NUHÇIXAN İnformasiya Agentliyi xəbər verir ki, tərkibində millət vəkillərinin də olduğu Türk Ağsaqqalları Birliyinin nümayəndə heyəti Naxçıvana səfər edib.
Qonaqlar əvvəlcə ümummilli lider Heydər Əliyevin Naxçıvan şəhərinin mərkəzində əzəmətlə ucalan abidəsini ziyarət edib, abidə önünə gül dəstələri qoyub, ulu öndərin xatirəsinə dərin ehtiramlarını bildiriblər.
Nümayəndə heyəti ulu öndərin zəngin və şərəfli ömür yolunu, ölkəmizin tərəqqisi uğrunda göstərdiyi xidmətləri özündə əks etdirən videokompozisiyaya baxıblar.
Sonra Türk Ağsaqqalları Birliyinin sədri və təşkilat komitəsinin üzvləri Naxçıvan Dövlət Universitetində olublar.
Universitetin Diplomatiya kabinəsində keçirilən görüşdə ali təhsil ocağının rektoru Elbrus İsayev rəhbərlik etdiyi universitetin 55 illik tarixi inkişaf yolu, maddi-texniki bazası, müasir tədris üsulları barədə məlumat verib. Qeyd edilib ki, universitetdə 8 mindən artıq tələbənin təhsili ilə minə yaxın akademik heyət məşğul olur. Rektor universitetin beynəlxalq əlaqələri, xarici ölkə universitetləri ilə bağlanan müqavilələr, qardaş Türkiyə Universitetləri ilə ikili diplom layihələri barədə də danışıb. Ali təhsil ocağının qazandığı elmi nailiyyətləri diqqətə çatdıran rektor universitetdə ingilisdilli ixtisasların fəaliyyətindən söz açıb. Elbrus İsayev ölkəmizdə elektron təhsil şəbəkəsini quran ilk universitet kimi ali təhsil ocağında hibrid təhsil metodunun uğurla tətbiqini də diqqətə çatdırıb.
Rektor Britaniya Şurasının universitetdə açdığı IELTS qeydiyyat və imtahan mərkəzinin fəaliyyətə başlamasını ali təhsil ocağının qazandığı nailiyyətlər sırasında qeyd edib. Vurğulanıb ki, mərkəzin ilk imtahanı bu ilin iyun ayında keçiriləcək. Əcnəbi tələbələrin sayca üstünlüyü ilə ölkə universitetləri sırasında öz öncüllüyünü qoruyan ali təhsil ocağında 10 ölkədən 1500 tələbə təhsil alır.
Türk Ağsaqqalları Birliyinin sədri, Yeni Azərbaycan Partiyası Veteranlar Şurasının üzvü, akademik Sudeif İmamverdiyev təhsilin və tədrisin yüksək səviyyədə təşkilindən, muxtar respublikanın tələbləri nəzərə alınmaqla aparılan kadr potensialının əhəmiyyətini qeyd edib.
Millət vəkili, Yeni Azərbaycan Partiyasının İdarə Heyətinin üzvü Hikmət Babaoğlu universitet kollektivini 55 illik yubiley münasibətilə təbrik edib, ali təhsil ocağının inkişaf perspektivləri ilə bağlı fikirlərini bildirib.
Jurnalist, Ekspert Mərkəzinin rəhbəri Ceyhun Musaoğlu, Türk Ağsaqqalları Birliyi Təşkilat Komitəsinin üzvü Eyvaz Hümbətov, Missiya Media Qrupunun baş redaktoru, Türk Ağsaqqalları Birliyinin Aparat rəhbəri Nicat Dağlar universitet barədə xoş təəssüratlarını paylaşıb, görülən işlərdən məmnunluq hisslərini dilə gətiriblər.
Sonda Türk Ağsaqqalları Birliyinin sədri, Yeni Azərbaycan Partiyası Veteranlar Şurasının üzvü, akademik Sudeif İmamverdiyev universitetin xatirə kitabına ürək sözlərini yazıb.
Səfər çərçivəsində qonaqların iştirakı ilə Naxçıvan Dövlət Universitetində ustad dərsləri də keçirilib.
Səadət Əliyeva