Görkəmli ziyalılar NDU-da ustad dərsi keçiblər - FOTOLAR
NUHÇIXAN İnformasiya Agentliyi xəbər verir ki, Naxçıvanda səfərdə olan Türk Ağsaqqalları Birliyinin Sədri və Naxçıvan Dövlət Universitetinin müəllim və tələbələri üçün ustad dərsləri keçiblər.
Naxçıvan Dövlət Universitetinin rektoru Elbrus İsayev qonaqları salamlayaraq ustad dərslərinin təşkilini yüksək qiymətləndirib və belə görüşlərin əhəmiyyətindən bəhs edib.
Türk Ağsaqqalları Birliyinin Sədri, dövlət və elm xadimi, Azərbaycan Tibb Universitetinin Urologiya kafedrasının müdiri, akademik Sudeyf İmamverdiyev urologiyaya dair xəstəliklər, onların yaranma səbəbləri, əlamətləri və müalicəsindən ətraflı bəhs edib.
Millət vəkili, siyasi elmlər doktoru, professor, Hikmət Babaoğlu “Beynəlxalq münasibətlər”, “Xarici siyasət”, “Yeni dünya nizamı” kimi mövzularda çıxış edib. Vurğulanıb ki, Azərbaycan həyata keçirdiyi məqsədyönlü, strateji diplomatiya sayəsində dünya siyasətinin cazibə mərkəzlərindən birinə çevrilməkdədir. Bunun əsas səbəblərindən biri Prezident İlham Əliyevin dünya siyasətində baş verən dəyişiklikləri düzgün qiymətləndirmək və bu kontekstdə mili təhlükəsizliyimizi, milli maraqlarımızı yeni çağırışlarla uzlaşdıra bilmək bacarığıdır.
Rektor Elbrus İsayev hər iki ziyalıya ustad dərsin təşkilinə görə universitetin təşəkkürnaməsini təqdim edib.
Missiya Media Qrupunun baş redaktoru, Türk Ağsaqqalları birliyinin aparat rəhbəri Nicat Dağlar isə tələbə-jurnalistlər üçün təşkil etdiyi ustad dərsində jurnalistikada yeni yaranan istiqamətlər, ölkəmizdə fəaliyyət göstərən informasiya saytları və müasir medianın inkişaf perspektivləri barədə məlumat verib.
Türk Ağsaqqalları Birliyinin Təşkilat komitəsinin üzvü Akif Cabbarov tələbələrə jurnalistikanın prinsiplərinə uyğun hərəkət etməyi və peşə vəzifələrinə əməl etməyi tövsiyə edib. Jurnalistikanın nəzəri prinsiplərindən danışan Akif Cabbarov mütaliənin gənclərin dünyagörüşündə mühüm rol oynadığını qeyd edib.
Jurnalist Ekspert Mərkəzinin rəhbəri Ceyhun Musaoğlu isə bildirib ki, peşəkar jurnalist olmaq üçün nəzəri biliklər deyil, təcrübə də mühüm əhəmiyyət daşıyır.
Fəxriyyə Səyyadova
Məmmədbağır Dünyamalıyev