Xəlil Rza Ulutürkün 90 illik yubileyinə həsr olunan elmi konfrans keçirilib - FOTOLAR
NUHÇIXAN İnformasiya Agentliyi xəbər verir ki, “Naxçıvan” Universitetində XX əsr Azərbaycan ədəbiyyatının görkəmli nümayəndəsi, Xalq şairi Xəlil Rza Ulutürkün 90 illik yubileyinə həsr olunmuş elmi konfrans keçirilib.
Konfrans Xalq şairi Xəlil Rza Ulutürkün həyat və fəaliyyətini əks etdirən videoçarxın nümayişi ilə başlayıb.
Sonra “Azərbaycan dili və ədəbiyyat müəllimliyi” ixtisası üzrə I kurs tələbələrinin hazırladıqları “Türkün haqq səsi - Xəlil Rza Ulutürk” adlı ədəbi-bədii kompozisiya nümayiş etdirilib.
Konfransda “Naxçıvan” Universitetinin rektoru Nurlana Əliyeva çıxış edərək bildirib ki, Xəlil Rza Ulutürkün bütün yaradıcılığı rəşadətlə, bitib-tükənməyən mübarizə ilə, zülmə qarşı üsyan bayrağı qaldırmaqla səciyyələnir. Buna görə də yaradıcılığı boyu qələmə aldığı misralarında vətən məhəbbəti, torpaq sevgisi, sülh, əmin-amanlıq, azadlıq kimi dəyərlər həmişə ana xətt olaraq davam edib. Azərbaycanı sevən, onun müstəqil dövlət olması arzusu ilə yaşayan və çarpışan, bütün buxovları qırmaq, zəncirləri yox etmək, müstəmləkə və zülmün qarşısına sədd çəkmək istəyi onu azadlıq şairinə çevirib. Onun bütün əsərlərinin baş qəhrəmanı Azərbaycan olub. Azərbaycan Pedaqoji Universitetində bir müddət müəllimlik edən şair dünya ədəbiyyatından, Nizami Gəncəvidən də tərcümələr edib.
Qeyd edilib ki, müasir Azərbaycan ədəbiyyatının görkəmli nümayəndəsi Xəlil Rza Ulutürk müxtəlif vaxtlarda “Əməkdar incəsənət xadimi”, “Xalq şairi” fəxri adlarına və “İstiqlal” ordeninə layiq görülüb, yubileyləri ölkə səviyyəsində geniş qeyd edilib.
Aynur Əliyeva