Naxçıvanda liseylərə qəbul imtahanları keçirilib - FOTOLAR
Naxçıvan Muxtar Respublikası Təhsil Nazirliyinin mətbuat xidmətindən NUHÇIXAN İnformasiya Agentliyinə verilən məlumata görə, mayın 14 Naxçıvan Qızlar və Şərur şəhər Fizika-Riyaziyyat Təmayüllü liseylərinə qəbul imtahanları keçirilib.
2022-2023-cü tədris ili üzrə Naxçıvan Qızlar liseyinə qəbul imtahanında iştirak etmək üçün ümumtəhsil məktəblərinin 4-cü sinfini bitirən qızlar qeydiyyatdan keçib. Ümumilikdə, imtahanda 296 şagird iştirak edib. Müsabiqədə şagirdlərə Azərbaycan dili fənni üzrə 30, riyaziyyat fənni üzrə 30, ingilis dili fənni üzrə 10 sual olmaqla, ümumilikdə 70 sual təqdim edilib. Sualları cavablandırmaq üçün 180 dəqiqə vaxt verilib.
2022-2023-cü tədris ili üzrə Şərur şəhər Fizika-Riyaziyyat Təmayüllü Liseyə isə qəbul imtahanı Naxçıvan şəhər 5 nömrəli tam orta məktəbdə keçirilib. İmtahanda iştirak etmək üçün ümumtəhsil məktəblərinin 6-cı sinfini bitirən oğlan şagirdləri qeydiyyatdan keçib və ümumilikdə 399 şagird imtahanda iştirak edib. Müsabiqədə şagirdlərə Azərbaycan dili fənni üzrə 20, riyaziyyat və fizika fənlərinin hər biri üzrə 25, ingilis dili fənni üzrə 15, coğrafiya tarix, biologiya fənlərinin hər biri üzrə 5 sual olmaqla, ümumilikdə 100 sual təqdim edilib. Sualları cavablandırmaq üçün 180 dəqiqə vaxt verilib.
Hər iki imtahanın nəticələri mayın 15-də Təhsil Nazirliyinin İmtahan Mərkəzi tərəfindən yoxlanılaraq elan olunub. Liseylərin hər birinə imtahanlarda ən yüksək nəticə göstərən 60 şagird qəbul olunacaq. Şagirdlər Naxçıvan Qızlar liseyində 5-ci, Şərur şəhər Fizika-Riyaziyyat Təmayüllü liseydə isə 7-ci sinifdən təhsillərini davam etdirəcəklər.