Ali təhsil ocağında tədqiqat işlərində fərqlənən tələbələr mükafatlandırılıb - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universitetində 2021-2022-ci tədris ilində Tələbə Elmi Cəmiyyətinin xətti ilə yerinə yetirilmiş elmi-tədqiqat işlərinin mükafatlandırma mərasimi keçirilib.
Tədbirdə universitetin rektoru Elbrus İsayev qeyd edib ki, Tələbə Elmi Cəmiyyətinin işi tələbələrə elmi eksperiment aparmaq və alınmış nəticələri təhlil etmək, yerinə yetirilmiş tədqiqatların nəticələrinə dair hesabat hazırlayaraq çıxış etmək və elmi diskussiya aparmaq bacarıqlarının aşılanmasına xidmət etməkdir. Rektor cəmiyyətin işini yüksək qiymətləndirərək bundan sonrakı fəaliyyətində uğurlar arzulayıb.
2021-2022-ci tədris ilində cəmiyyətin xətti ilə yerinə yetirilmiş elmi-tədqiqat işlərinin yekunları barədə Tələbə Elmi Cəmiyyətinin sədri Təbrizə Bağırova bildirib ki, cari tədris ilində 414 müəllimin rəhbərliyi ilə 677 tələbə elmi tədqiqat işi aparıb. Ötən illə müqayisədə elmi tədqiqat işlərində 20 faiz artım qeydə alınıb.
Sonra Tələbə Elmi Cəmiyyətinin fəaliyyətini əks etdirən videoçarx nümayiş etdirilib.
Tədbirdə Stomatologiya kafedrasının müdiri, tibb üzrə fəlsəfə doktoru, dosent Rauf Cəfərov, Dünya iqtisadiyyatı kafedrasının müdiri, iqtisad üzrə fəlsəfə doktoru, dosent Cavadxan Qasımov kafedralarda yerinə yetirilən elmi-tədqiqat işləri barədə çıxış ediblər.
Tələbə Elmi Cəmiyyəti xətti ilə ən yaxşı elmi-tədqiqat işini yerinə yetirən tələbələr diplomlarla təltif olunublar. Həmçinin cəmiyyətin fəaliyyətində və elmi-tədqiqat işlərində fəallıq göstərən müəllim və tələbələrə təşəkkürnamələr təqdim edilib.
Sonda “Tibb” ixtisası üzrə I kurs əcnəbi tələbə İnayet Motuk və “Stomatologiya” ixtisası üzrə V kurs tələbəsi Fərid Cəfərli yaradılan şəraitə görə minnətdarlıq ediblər.
Fəxriyyə Səyyadova