NDU-da Milli Qurtuluş Günü qeyd edilib - FOTOLAR
NUHÇIXAN İnformasiya Agentliyi xəbər verir ki, Naxçıvan Dövlət Universitetində “Heydər Əliyev: davamlı inkişaf strategiyasının müəllifi” mövzusunda tədbir keçirilib.
Yeni Azərbaycan Partiyası Universiteti şəhərciyi Ərazi Partiya Təşkilatının keçirdiyi tədbirdə universitetin rektoru Elbrus İsayev tarixə qızıl hərflərlə yazılan əlamətdar günün ulu öndər Heydər Əliyevin adı ilə bağlı olduğunu diqqətə çatdırıb. Bildirilib ki, ümummilli lider Heydər Əliyevin hakimiyyətə qayıdışı dövlətimizin möhkəmlənməsində, sivil dünyaya sıx inteqrasiya prosesinə qoşulmasında və xalqımızın strateji mənafelərini təmin edən modern cəmiyyətin qurulmasında həlledici rol oynayıb. Vurğulanıb ki, Qarabağın taleyini həll edən 44 günlük Vətən müharibəsində mühüm rol oynayan diplomatik strategiyanın təməli də məhz ulu öndər Heydər Əliyevin hakimiyyət illərində qoyulub. Dahi rəhbərin hakimiyyətə gəlişindən sonra ölkədə müstəqil dövlət təsisatları yaradıldı, demokratik prinsiplər bərqərar oldu, Azərbaycan dövlətinin xarici siyasəti, dünyanın aparıcı dövlətləri və beynəlxalq təşkilatları ilə əlaqələri milli maraqlara və uzaqgörən siyasi perspektivlərə əsaslanan xətlə inkişaf etməyə başladı. Bütün bunların fonunda muxtar respublikanın inkişafı istiqamətində əhəmiyyətli addımlar atıldı.
Rektor tədbir iştirakçılarını bayram münasibətilə təbrik edib.
“Milli Qurtuluş Günü dövlətçilik tariximizin şanlı və parlaq səhifəsidir” mövzusunda Tarix-filologiya fakültəsinin dekanı, filologiya üzrə fəlsəfə doktoru, dosent Arif Ağalarov çıxış edərək qeyd edib ki, ümummilli liderimiz Azərbaycanın müstəqilliyinin qüdrətli təminatı missiyasını uğurla həyata keçirərək Milli Ordunun formalaşması, nizami silahlı qüvvələrin yaradılması, torpaqlarımızın müdafiəsi ilə bağlı ciddi addımlar atıb.
Beynəlxalq münasibətlər ixtisaslaşması üzrə I kurs magistrant Nelli Quliyeva ulu öndər Heydər Əliyevin əsasını qoyduğu uğurlu dövlət gənclər siyasətindən danışıb.
Tədbirdə Yeni Azərbaycan Partiyası sıralarına yeni üzv olan universitet tələbələrinə üzvlük vəsiqələri təqdim edilib.
Sonra Yeni Azərbaycan Partiyası Naxçıvan Dövlət Universiteti şəhərciyi ərazi partiya təşkilatı tərəfindən həyata keçirilən “Mənim Partiyam- Yeni Azərbaycan Partiyası” intellektual yarışının qalibləri mükafatlandırılıb.
Fəxriyyə Səyyadova