Naxçıvan Dövlət Universiteti ilə İstanbul Yeditepe Universiteti arasında birgə əməkdaşlığa dair protokol imzalanıb - FOTOLAR
I Beynəlxalq Tibbi Forum çərçivəsində Naxçıvan Dövlət Universiteti ilə İstanbul Yeditepe Universiteti arasında görüş olub.
NUHÇIXAN İnformasiya Agentliyi xəbər verir ki, görüşdə NDU-nun rektoru Elbrus İsayev ali təhsil ocağının kadr potensialı, professor-müəllim heyətinin malik olduğu elmi baza, maddi-texniki imkanlar, beynəlxalq əlaqələri, tərəfdaş olduğu xarici ölkə universitetləri haqqında məlumat verib. Universitetin beynəlxalq əlaqələrində Türkiyə universitetlərinin xüsusi rolu olduğunu qeyd edən rektor vurğulayıb ki, ali təhsil ocağı Türkiyənin 130-dan çox universiteti ilə beynəlxalq əməkdaşlığa malikdir. Bu tədris ilindən etibarən Yaponiya Universitetləri ilə də beynəlxalq əlaqələr qurulub.
Bildirilib ki, universitet elmi-tədqiqat fəaliyyətinə xüsusi diqqət yetirir və professor-müəllim heyətinin beynəlxalq indeksli nəşrlərdə elmi məqalələrinin dərc olunması məqsədilə nüfuzlu jurnallarla əməkdaşlığa üstünlük verilir.
Yeditepe Universitetinin rektoru, professor Canan Aykut Bingöl ilk dəfədir NDU-da olmaqdan məmnun olduğunu bildirib. Qeyd edilib ki, 1996-cı ildə əsası qoyulan İstanbul Yeditepe Universiteti bir çox sahədə öncül olmaqla bərabər ABŞ, Kanada, Rusiya, Cənubi Amerika başda olmaq üzrə dünyanın müxtəlif ölkələrindən 700-dən çox universitet ilə beynəlxalq əməkdaşlığa malikdir. 13 fakültə ilə texniki sahədə kadr hazırlığını həyata keçirən universitetdə Tibb, İqtisadiyyat, Mühəndislik, Hüquq, Ədəbiyyat və digər ixtisaslar üzrə müasir akademik proqramlara uyğun ingilis dilində tədris həyata keçirilir. Professor diqqətə çatdırıb ki, universitetimiz Türkiyədə ilk dəfə olaraq günəş enerjisindən istifadə edərək öz enerjisini təmin edən universitetdir.
Hər iki universitet arasında birgə əməkdaşlığa dair müzakirələr aparıldıqdan sonra qarşılıqlı əməkdaşlığa dair protokol imzalanıb.
Protokolda akademik məlumat və materialların mübadiləsi, akademik sahədə əməkdaşlıq, professor-müəllim heyətinin, tədqiqatçıların və digər elmi-tədqiqat işçilərinin mübadiləsi, magistr və bakalavr sahələri üzrə mübadilə proqramları, birgə layihələr və tədqiqat əməkdaşlığı həyata keçirmək, mühazirələrin aparılması və simpoziumların təşkili maddələri, həmçinin sosial elmlərdə NDU təcrübəsindən yararlanmaq məsələləri öz əksini tapıb.
Qarşılıqlı hədiyyələr təqdim olunduqdan sonra Yeditepe Universitetinin rektoru, professor Canan Aykut Bingöl universitetin xatirə kitabına ürək sözlərini yazıb, xatirə şəkli çəkdirilib.
Səadət Əliyeva