I və IV ixtisas qrupları üzrə yay imtahanları üçün 16 mindən çox abituriyent qeydiyyatdan keçib

I və IV ixtisas qrupları üzrə yay imtahanlarına qeydiyyat iyulun 4-ü saat 23:59-dək davam edəcək.

NUHÇIXAN İnformasiya Agentliyi Dövlət İmtahan Mərkəzinin saytına istinadla xəbər verir ki, bu gün saat 09:50-yə olan məlumata görə, indiyədək I ixtisas qrupu üzrə 13 min 460 nəfər (Azərbaycan bölməsi 12 min 183, rus bölməsi – 1277), IV ixtisas qrupu üzrə 2 min 682 nəfər (Azərbaycan bölməsi üzrə 2296, rus bölməsi üzrə 386) qeydiyyatdan keçib.

İmtahanda yalnız göstərilən tarixlərdə qeydiyyatdan keçmiş abituriyentlər iştirak edə bilərlər.

Abituriyentlər “Şəxsi kabinet”inin hesabına imtahanda iştirak haqqını (40 AZN) əlavə edib verilən link (https://eservices.dim.gov.az/erizebak/cehd2 /) vasitəsilə imtahana yazıla bilərlər. Aşağıdakı kateqoriyadan olan abituriyentlər üçün imtahan ödənişsizdir: Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin uşaqları; şəhid ailəsinin üzvləri; valideynlərini itirmiş və valideyn himayəsindən məhrum olmuş uşaqlar; məcburi köçkün statusu olan şəxslər; I və II dərəcə əlilliyi müəyyən edilmiş şəxslər, o cümlədən sağlamlıq imkanları məhdud 18 yaşınadək uşaqlar. Bu abituriyentlər haqqında məlumat DİM tərəfindən müvafiq icra orqanlarının informasiya sistemlərindən elektron üsullarla əldə olunur.

Xatırladaq ki, II və III ixtisas qrupları üzrə yay imtahanlarına qeydiyyat iyunun 21-də başa çatıb.