Birinci ixtisas qrupu üzrə ali məktəblərə qəbul imtahanında 21 min 277 abituriyentin iştirakı nəzərdə tutulur

Dövlət İmtahan Mərkəzi (DİM) iyulun 21-də I və IV ixtisas qrupları üzrə ali təhsil müəssisələrinə qəbul imtahanları (II cəhd) keçirəcək.

DİM-dən NUHÇIXAN İnformasiya Agentliyinə bildirilib ki, imtahanlarda I ixtisas qrupu üzrə 21 min 277 abituriyentin iştirakı nəzərdə tutulur.

Xatırladaq ki, iştirakçılar iyulun 14-dən etibarən DİM-in saytında imtahana buraxılış vərəqəsini çap edə bilirlər. Buraxılış vərəqəsində imtahanın keçiriləcəyi tarix, şəhər (rayon), bina, zal, başlanma vaxtı və abituriyentin imtahan binasına gəlmə vaxtı və s. məlumatlar qeyd olunub.