Azərbaycan Respublikası Baş Prokurorluğunun Elm-Tədris Mərkəzi ilə NDU arasında birgə əməkdaşlığın əsası qoyulub - FOTOLAR

231

Azərbaycan Respublikası Baş Prokurorluğu orqanları ilə Naxçıvan Dövlət Universiteti arasında qarşılıqlı faydalı əməkdaşlığın genişləndirilməsi məqsədilə Elm-Tədris Mərkəzinin rəisi Mübariz Əhmədov və rəhbərlik etdiyi nümayəndə heyəti Naxçıvan Dövlət Universitetində olub.

NDU-nun Televiziya, mətbuat və ictimaiyyətlə əlaqələr bölməsindən NUHÇIXAN İnformasiya Agentliyinə verilən məlumata görə, ikitərəfli görüşdə ali təhsil ocağının rektoru Elbrus İsayev universitetin yaranma tarixinə nəzər salaraq qeyd edib ki, bu il NDU 55 illik yubileyini qeyd edir. Rektor hər fakültənin ayrıca binada fəaliyyət göstərdiyini vurğulayaraq universitetdə mövcud müasir tədris üsulları haqda məlumat verib. Diqqətə çatdırılıb ki, dünyanın 130-dan artıq ali məktəbi ilə beynəlxalq əməkdaşlığa malik olan universitetdə 12 ölkədən 2200 əcnəbi tələbə təhsil alır. Rektor Ali Məclis Sədrinin müvafiq ixtisasların hamiliyə verilməsinə dair sərəncamlarını diqqətə çatdıraraq Hüquqşünaslıq ixtisası üzrə də tələbələrin aidiyyatı dövlət qurumlarında təcrübə keçdiklərini qeyd edib.

Elbrus İsayev həmçinin vurğulayıb ki, universitetdə 1996-cı ildən Hüquqşünaslıq ixtisası üzrə kadr hazırlığı həyata keçirilir. Muxtar respublikada hüquq-mühafizə orqanlarında çalışanların əksəriyyəti universitetin bu ixtisas üzrə bitirən məzunlarıdır. İndiyədək bu ixtisas üzrə 3127 tələbənin məzun olduğunu qeyd edən rektor diqqətə çatdırıb ki, hal-hazırda universitetdə Hüquqşünaslıq ixtisası üzrə əyani, qiyabi, əlavə ali təhsil olmaqla 502 tələbə təhsil alır. Magistratura səviyyəsində isə 4 ixtisaslaşma üzrə magistrant hazırlığı aparılır.

Baş Prokurorluğunun Elm-Tədris Mərkəzinin rəisi Mübariz Əhmədov bildirib ki, rəhbərlik etdiyi mərkəz Azərbaycan Respublikası Baş Prokurorluğunun müstəqil struktur qurumudur. Mərkəzin əsas vəzifə və funksiyalarından danışan Mübariz Əhmədov mərkəzin tabeliyində Elektron kitabxana fondunun gələcəkdə universitetin Elektron kitabxanası ilə inteqrasiyası barədə rəy və təkliflərini irəli sürüb.

Görüşün nəticələrinə uyğun olaraq, Azərbaycan Respublikasının Baş Prokurorluğu və Naxçıvan Dövlət Universiteti arasında əməkdaşlığa dair müqavilə imzalanıb.

Müqavilədə universitetdə Hüquqşünaslıq ixtisası üzrə təhsil alan tələbələrin, doktorantların, müəllimlərin Baş Prokurorluğun struktur bölmələrində təcrübə keçməsi, ali təhsil ocağı tərəfindən metodik materiallar və elmi əsərlərə Baş Prokurorluğun müvafiq işçiləri tərəfindən, habelə Baş Prokurorluq tərəfindən hazırlanmış vəsaitlərə universitetin elmi heyəti tərəfindən rəylərin, tövsiyyələrin verilməsi, birgə elmi konfransların, dəyirmi masaların və görüşlərin keçirilməsi, elmi məqalələrin, vəsaitlərin və mətbu nəşrlərin hazırlanması məqsədilə birgə elmi-praktiki araşdırmaların aparılması və digər bu kimi məsələlər öz əksini tapıb.

Eyni zamanda əməkdaşlıq tərəflərin müvafiq əməkdaşlarının nəzəri biliklərinin və peşə hazırlığının artırılması məqsədilə birgə təlim kurslarının, seminar-treninqlərin və mühazirələrin təşkili, universitetin tələbələrinin könüllülər qismində Baş Prokurorluğun struktur bölmələrində işə cəlb edilməsi məsələləri də qeyd olunub.

Müqavilədən sonra ali təhsil ocağının Beynəlxalq münasibətlər və hüquq fakültəsində, “Kriminalistika” laboratoriyasında olub, auditoriyada dərs prosesini izləyiblər.

Səadət Əliyeva

Digər xəbərlər

Xəbərin mətnində orfoqrafik səhv var

Seçilən mətn düzəliş üçün göndəriləcək: