Hüseyn Cavidin anadan olmasının 140 illiyinə həsr olunan tədbir keçirilib - FOTOLAR
NUHÇIXAN İnformasiya Agentliyi xəbər verir ki, Məmməd Səid Ordubadi adına Naxçıvan Muxtar Respublika Kitabxanasında görkəmli şair, dramaturq Hüseyn Cavidin anadan olmasının 140 illiyinə həsr olunan tədbir keçirilib.
Tədbirdə kitabxananın direktor müavini Yeganə Rüstəmova bildirib ki, bu il görkəmli şair-dramaturq, Azərbaycan romantik şeirinin və mənzum faciənin banisi Hüseyn Cavidin anadan olmasının 140 ili tamam olur. Azərbaycan Respublikası Prezidentinin 24 sentyabr 2022-ci il tarixli Sərəncamı ilə Hüseyn Cavidin 140 illiyi ölkəmizdə qeyd edilir. Naxçıvan Muxtar Respublikası Ali Məclisinin Sədri muxtar respublikada Sərəncamın icrasını təmin etmək məqsədilə Tədbirlər Planı təsdiq edib.
Tədbirdə sənətşünaslıq üzrə fəlsəfə doktoru, dosent Ələkbər Qasımov “Hüseyn Cavid və Naxçıvan teatrı”, AMEA Naxçıvan Bölməsinin İncəsənət, Dil və Ədəbiyyat İnstitutunun doktorantı Aysel Behbudlu “Hüseyn Cavidin siyasi və hüquqi görüşləri” mövzusunda çıxış ediblər. Çıxışlarda şair-dramaturqun Azərbaycan ədəbiyyatına gətirdiyi yeniliklərdən, milli teatr tarixində oynadığı roldan, həmçinin bütün həyatı boyunca ədalət və humanizm uğrunda apardığı mübarizədən bəhs olunub.
Bildirib ki, Azərbaycanın ictimai fikir tarixində silinməz iz qoyan Hüseyn Cavidi ötən əsrin 30-cu illərinin repressiya dalğası qərq etsə də, ədib sanki yenidən doğuldu, zəngin ədəbi irsi zamanın sınağından alnıaçıq çıxaraq layiq olduğu qiymətini aldı. 1982-ci ildə ümummilli lider Heydər Əliyevin şəxsi təşəbbüsü ilə dahi söz ustadının nəşinin uzaq Sibirdən doğma yurduna gətirilməsi, Naxçıvan şəhərində Hüseyn Cavid məqbərəsinin və ev-muzeyinin yaradılması səma şairinə qayğı və məhəbbətin təntənəsi idi.
Sonra şairin həyatından bəhs edən “Əbədiyyətə gedən yol” filmi nümayiş etdirilib, “Hüseyn Cavid-140” başlıqlı sərgiyə baxış olub.
Hafizə Əliyeva