“Naxçıvan” Universitetində Xurşidbanu Natəvanın anadan olmasının 190 illiyinə həsr olunmuş tədbir keçirilib - FOTOLAR
NUHÇIXAN İnformasiya Agentliyi xəbər verir ki, “Naxçıvan” Universitetində Azərbaycan bədii fikrinin görkəmli nümayəndəsi Xurşidbanu Natəvanın anadan olmasının 190 illiyinə həsr olunmuş tədbir keçirilib.
Tədbirdə “Naxçıvan” Universitetinin rektoru Nurlana Əliyeva bildirib ki, Azərbaycan Respublikası Prezidentinin "Xurşidbanu Natəvanın 190 illiyinin qeyd edilməsi haqqında" Sərəncamına uyğun olaraq bu il XIX əsr Azərbaycan ədəbiyyatının görkəmli nümayəndəsi, ictimai xadim, Xurşidbanu Natəvanın yubileyi ölkəmizdə geniş qeyd edilir. Görkəmli ədibin zəngin bədii yaradıcılığından bəhs edən rektor vurğulayıb ki, Xurşidbanu Natəvan Azərbaycan mədəniyyətində və ictimai həyatında dərin izlər qoyub. O, istər ictimai fəaliyyəti, istərsə də ədəbi yaradıcılığı ilə nümunəvi Azərbaycan xanımı siması ilə tanınır. Füzuli ədəbi məktəbinin qüdrətli nümayəndələrindən olan Xurşidbanu Natəvanın anadan olmasının 190 illiyinin dövlət səviyyəsində qeyd olunması Azərbaycan xalqının ədəbiyyata, incəsənətə, öz sənətkarlarına və dahi şəxsiyyətlərinə verdiyi dəyərin göstəricisidir.
Tədbir bədii hissə ilə davam edib. “Azərbaycan dili və ədəbiyyat müəllimliyi” ixtisası üzrə III kurs tələbələri “Qarabağın taleyini yaşayan şairə - Xurşidbanu Natəvan - 190” adlı ədəbi-bədii kompozisiya təqdim ediblər.
Rektor Nurlana Əliyeva uğurlu təqdimata görə tələbələri təbrik edib.
Aynur Əliyeva