NDU-da ingilisdilli dərs vəsaitinin təqdimatı olub - FOTOLAR
Müəllifləri Nahidə Heydərova və Sənəm Paşayeva olan “English for art faculty” kitabının təqdimatı Naxçıvan Dövlət Universitetinin Xarici dillər fakültəsində keçirilib.
Universitetin Televiziya, mətbuat və ictimaiyyətlə əlaqələr bölməsindən NUHÇIXAN İnformasiya Agentliyinə bildirilib ki, tədbirdə universitetin Elmi katibi Orxan Cəfərov müxtəlif ixtisaslarla bağlı ingilisdilli kitabların çap olunmasının tələbələrin xarici dil biliklərini inkişaf etdirmək yolunda faydalı olduğunu diqqətə çatdırıb, kitabı İncəsənət fakültəsi tələbələri üçün qiymətli töhfə kimi dəyərləndirib.
Dərsliklərin xarici dildə nəşr olunmasının vacibliyini vurğulayan Xarici dillər fakültəsinin dekanı, filologiya üzrə fəlsəfə doktoru, dosent Şirməmməd Qulubəyli kitabla bağlı tədbir iştirakçılarını məlumatlandırıb. Diqqətə çatdırılıb ki, vəsaitdə görkəmli xanəndə, bəstəkar, musiqi xadimi, Azərbaycan incəsənətinin nümayəndələri haqqında ingilis dilində geniş məlumatlar öz əksini tapır.
Kitabın teatr sahəsində təhsil alan tələbələr üçün də faydaları qeyd olunub.
Sonda müəlliflər göstərilən diqqətə görə minnətdarlıqlarını ifadə ediblər.
Sevinc Hüseynova