NDU müəllimlərinin yubileyləri qeyd olunub - FOTOLAR
Naxçıvan Dövlət Universitetinin Pedaqoji fakültəsinin Bədən tərbiyəsi və idman kafedrasının baş müəllimi Nazim Əliyevin 70, həmin kafedranın müəllimi, dosent Yusif Vəliyevin 60 illik yubileyləri keçirilib.
NUHÇIXAN İnformasiya Agentliyi xəbər verir ki, bu münasibətlə keçirilən tədbirdə rektor Elbrus İsayev hər iki müəllimin kadr hazırlığındakı əməyindən söz açıb.
Nazim Əliyevin və Yusif Vəliyevin universitetdə işlədiyi müddət ərzində tələbələr arasında idmanın xüsusilə futbol və voleybolun inkişafından danışan rektor universitetin fəxri fərmanını və gül dəstəsini onlara təqdim edib.
Yubilyarların həyat və fəaliyyətləri haqqında iştirakçılara məlumat verən Pedaqoji fakültənin dekanı, pedaqogika üzrə fəlsəfə doktoru, dosent Vəli Əliyev bildirib ki, Yusif Vəliyevin universitetdə müəllimlik fəaliyyətinə başladığı ilk dövrlərdən etibarən fakültələrarası futbol yarışlarının təşkilində, tələbələrin təlim-məşq toplantısına cəlb olunmasında əvəzsiz xidmət göstərib. Yusif Vəliyevin rəhbərliyi altında universitetin futbol komandası 4 dəfə Naxçıvan Muxtar Respublika çempionu, 4 dəfə muxtar respublika kubokunun sahibi və 6 dəfə Ümummilli Lider Heydər Əliyevin xatirəsinə həsr olunan futbol turnirinin qalibi olub.
Voleybol idman növü üzrə saysız-hesabsız uğuru olan Nazim Əliyevin tələbələri də bir çox yarışlardan və turnirlərdən qalib ayrılıb. Belə ki, yubilyar yığma komandaya rəhbərlik etdiyi dövrdən etibarən universitet komandası respublika və şəhər çempionatında birinci yerə layiq görülüb, 2009, 2010, 2011-ci illərdə Türkiyənin Qars şəhərində keçirilən Beynəlxalq turnirin qalibi olub.
Vəli Əliyev fakültə adından onlara hədiyyə təqdim edib.
Digər çıxış edənlər də təbriklərə qoşularaq yubilyar müəllimləri təbrik edib, bundan sonrakı fəaliyyətlərində onlara uğurlar arzulayıblar.
Sonda yubilyarlar təbriklərə, xoş sözlərə, göstərilən diqqətə görə minnətdarlıq ediblər.
Məmmədbağır Dünyamalıyev