NDU-nun müəllimi Las-Veqasda keçirilən beynəlxalq konqresdə iştirak edib - FOTOLAR

Naxçıvan Dövlət Universiteti Tibb fakültəsi Stomatologiya kafedrasının müdiri, tibb üzrə fəlsəfə doktoru Rauf Cəfərov Amerikanın Las-Veqas şəhərində ICOI (Beynəlxalq İmplantoloqlar Konqresi) yaradılmasının 50 illiyi ilə bağlı keçirilən yubiley mərasimində iştirak edib. Universitetin Televiziya, mətbuat və ictimaiyyətlə əlaqələr bölməsindən NUHÇIXAN İnformasiya Agentliyinə verilən məlumata görə, Azərbaycandan ümumilikdə 15 nəfər stomatoloq- implantoloqun qatıldığı beynəlxalq konqresdə muxtar respublikamızı təmsil edən implantoloq Rauf Cəfərov simpozium iştirakçılarına implantologiyada tətbiq olunan müasir metodlar, yeni implantoloji üsullar barədə ətraflı məlumat verilib. Ziqomatik implantlar adlanan üsulla tanış olan stomatoloqlara bildirilib ki, bu implantın digərindən fərqi ondadır ki, atrofiyalaşmış (sümüyü itmiş) çənələrdə digər ağır əməliyyatlar aparmamaq şərtilə bu implantoloji üsuldan istifadə etməklə diş sırası qüsurunu tam şəkildə bərpa etmək olur. 

Simpozium iştirakçılarına həmçinin bu implantların yerləşdirilməsi ilə bağlı ustad dərsləri keçirilib.

Qeyd edək ki, proqram çərçivəsində qonaqlar üçün Las-Veqas şəhərinin gəzməli yerlərinə helikopterlə şəhər gəzintisi təşkil olunub. Səfər müddətində iştirakçılar Los-Anceles şəhərində Hollivudu da ziyarət ediblər.

Səadət Əliyeva