NDU-da ulu öndər Heydər Əliyevin anım günü qeyd olunub - FOTOLAR
NDU-nun Televiziya, mətbuat və ictimaiyyətlə əlaqələr bölməsindən NUHÇIXAN İnformasiya Agentliyinə bildirilib ki, tədbirdə dahi liderin əziz xatirəsi 1 dəqiqəlik sükutla yad edilib. Sonra universitetin rektoru Elbrus İsayev ulu öndərimizin şərəfli ömür yolundan, Vətənimiz qarşısındakı tarixi xidmətlərindən danışıb. Qeyd edib ki, Heydər Əliyevin Azərbaycana rəhbərlik etdiyi illərdə onun uzaqgörən daxili və xarici siyasəti nəticəsində ölkəmizin nüfuzu artıb, hərtərəfli inkişafa nail olunub, müstəqilliyimiz əbədi və dönməz olub.
Elbrus İsayev vurğulayıb ki, Azərbaycan Respublikasının Prezidenti Heydər Əliyevin 12 iyun 2002-ci il tarixli Sərəncamı ilə Naxçıvan Dövlət Universitetinə yüksək özünüidarə statusu, muxtariyyət hüququ verilib. Ümummilli lider Heydər Əliyev müxtəlif vaxtlarda 1974, 1992-ci ildə iki dəfə və 1999-cu ildə olmaqla, ümumilikdə 4 dəfə Naxçıvan Dövlət Universitetində olub, muxtar respublikada ali təhsilin inkişafı naminə xidmətlər göstərib. Ulu öndər Heydər Əliyevin şah əsəri olan müasir Azərbaycan cənab İlham Əliyevin müdrik rəhbərliyi sayəsində Zəfər yolu ilə möhtəşəm uğurlara doğru inamla addımlayır.
Rektor Heydər Əliyevin zəngin irsinin öyrənilməsinin vacibliyini, bu irsin vətənpərvər və dövlətçiliyə sadiq vətəndaş yetişdirilməsi baxımından müstəsna əhəmiyyətini qeyd edib.
Tədbirdə “Zamanı qabaqlayan dahi - ümummilli lider Heydər Əliyev”, “Heydər Əliyevin dövlətçilik və siyasi fəaliyyətinin Naxçıvan dövrü” ilə də bağlı çıxışlar dinlənilib
Sonda dahi şəxsiyyətin həyat və fəaliyyətini əks etdirən film nümayiş olunub.