Naxçıvan Müəllimlər İnstitutunda bayram tədbiri keçirilib - FOTOLAR

NUHÇIXAN İnformasiya Agentliyi xəbər verir ki, Naxçıvan Müəllimlər İnstitutunda 31 Dekabr - Dünya Azərbaycanlılarının Həmrəyliyi Günü və Yeni il bayramı münasibətilə tədbir keçirilib.

Əvvəlcə İnstitutun “Təsviri-incəsənət müəllimliyi” ixtisası üzrə təhsil alan tələbələrinin əl işlərindən ibarət sərgiyə baxış olub.

Tədbirdə İnstitutun rektoru Azad Novruzov və Humanitar və ictimai fənlər kafedrasının müəllimi Qorxmaz Hacızadə müstəqil Azərbaycanın inkişafında və ərazi bütövlüyümüzün bərpasında həmrəyliyin rolundan danışıblar. Qeyd olunub ki, Azərbaycan xalqının birliyinin nəticəsində artıq iki ildir ki, Həmrəylik Günümüz tamamilə fərqli, daha yüksək əhvali-ruhiyyə ilə qarşılanır. Çünki torpaqlarımızın işğaldan azad olunması həm də milli həmrəylimizin təntənəsinin təcəssümüdür. Vurğulanıb ki, həmrəylik və birliyimizin memarı olan ulu öndər Heydər Əliyevin yolunu uğurla davam etdirən Prezident İlham Əliyev diaspor quruculuğu sahəsində genişmiqyaslı tədbirlər həyata keçirir. Bu bayram dünyanın 70-dən çox ölkəsində yaşayan 50 milyonluq azərbaycanlını əhatə edir.

Tədbirdə ölkəmizin müxtəlif ali təhsil ocaqlarından olan tələbələrin ünvanladıqları təbriklərdən ibarət videoçarx nümayiş etdirilib.

Sonra tədbir bədii hissə ilə davam edib. İnstitutun tələbələri maraqlı ifa və bədii qiraətlərlə bayram tədbirinə rəng qatıblar.

Leyla Cəfərzadə