Ali məktəblərdə 20 Yanvarla bağlı tədbirlər keçirilib - FOTOLAR
NUHÇIXAN İnformasiya Agentliyi xəbər verir ki, Naxçıvan Muxtar Respublikasında fəaliyyət göstərən ali təhsil müəssisələrində 20 Yanvar faciəsinin 33-cü ildönümü ilə bağlı tədbirlər keçirilib.
Tədbirdə əvvəlcə şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Naxçıvan Dövlət Universitetinin rektoru Elbrus İsayev, "Naxçıvan" Universitetinin rektoru Nurlana Əliyeva və Naxçıvan Müəllimlər İnstitutunun rektoru Azad Novruzov 1990-cı ilin yanvarında sovet imperiyasının qoşun birləşmələrinin Azərbaycan xalqına, dinc əhaliyə qarşı törətdiyi cinayətlərdən danışıb, ümummilli lider Heydər Əliyevin ölkə rəhbərliyinə qayıdışından sonra - 1994-cü ildə 20 Yanvar hadisələrinə siyasi-hüquqi qiymət verdiyini qeyd ediblər.
Tədbirlərdə həmçinin 20 Yanvar şəhidlərinin xatirəsinə həsr edilən videoçarxlar, kitab və rəsm əsərlərindən ibarət sərgilər nümayiş etdirilib, Vətən uğrunda canlarından keçən şəhidlər hörmət və ehtiramla anılıb.