Sabahdan etibarən məktəblilərin qış tətili başlayır - FOTOLAR

Sabahdan etibarən ümumtəhsil məktəblərində beş günlük məktəblilərin qış tətili başlayır.

NUHÇIXAN İnformasiya Agentliyi xəbər verir ki, Naxçıvan Muxtar Respublikası Təhsil Nazirliyi tərəfindən məktəblilərin qış tətili günlərində asudə vaxtlarının səmərəli təşkili məqsədilə bir sıra tədbirlərin keçirilməsi nəzərdə tutulub.

Təhsil Nazirliyinə birbaşa tabe 35 məktəbdənkənar təhsil müəssisəsinin hər birində qış tətili dövründə şagirdlərin asudə vaxtlarının səmərəli təşkili məqsədilə tədbirlər planları hazırlanıb. Şagirdlər məktəbdənkənar təhsil müəssisələrində yaradılan innovativ dərnəklərdə bilik və bacarıqlarını artırmaqla yanaşı öz vaxtlarını səmərəli keçirəcək.

Həmçinin Heydər Əliyev Uşaq-Gənclər Yaradıcılıq Mərkəzində “Bacarıqlı əllər”, “Bijuteriya” dərnəklərinin üzvləri tərəfindən hazırlanan əl işlərinin sərgisi və “Ebru sənəti” dərnəyinin üzvü Baxşəli Aylinin “Könlümün bağçası” adlı fərdi sərgisi təşkil olunacaq. Bununla yanaşı dərnək üzvlərinin Məmməd Səid Ordubadi adına Naxçıvan Muxtar Respublika Kitabxanası, Dövlət Film Fondu, Turist-Diyarşünaslıq və Texniki Yaradıcılıq mərkəzlərinə, eləcə də bir sıra muzey və tarixi abidələrə ekskursiyaları təşkil olunacaq.

Rayonlarda fəaliyyət göstərən məktəbdənkənar təhsil müəssisələri tərəfindən də bu cür ekskursiyaların keçirilməsi nəzərdə tutulur.

Novruz Məmmədov