Naxçıvanda STEAM Təlim-Tədris Mərkəzinə işə qəbul müsahibəsi keçirilib - FOTOLAR
Naxçıvan Muxtar Respublikası Təhsil Nazirliyinin mətbuat xidmətindən NUHÇIXAN İnformasiya Agentliyinə verilən məlumata görə, 30 mart 2023-cü il tarixindən Təhsil Nazirliyi tərəfindən STEAM Təlim-Tədris Mərkəzinə STEAM, Robototexnika, CNC-3D texnologiyaları, Qrafik-dizayner, Proqramlaşdırma, Elektronika, Dron uçuş idarəçiliyi və kodlaşdırma üzrə mütəxəssis-təlimçi vəzifələri üzrə işə qəbulla bağlı elan verilmişdi. Aprelin 19-da Naxçıvan Muxtar Respublikası Təhsil Nazirliyinin İmtahan Mərkəzində STEAM Təlim-Tədris Mərkəzinə işə qəbul müsahibəsi keçirilib.
Müsahibənin keçirilməsi üçün Naxçıvan Muxtar Respublikası Təhsil Nazirliyindən 1, STEAM təhsili üzrə müstəqil ekspert-mütəxəssis qismində 2 nəfər olmaqla, 3 üzvdən ibarət müsahibə komissiyası yaradılıb. Müsahibə mərhələsində namizədə verilən tapşırıqların yerinə yetirilməsi üçün 20 dəqiqə vaxt ayrılıb və namizədin proqram üzrə nəzəri bilikləri, peşəkarlıq səviyyəsi və informasiya texnologiya bilikləri, özünü təqdimetmə, vakant vəzifə üçün zəruri olan keyfiyyətləri, layihələndirmə və innovativ düşüncəsi, yaradıcı və yenilikçi təfəkkürü, STEAM təhsili üzrə bilik və bacarığı yoxlanılıb. STEAM Təlim-Tədris Mərkəzinə götürüləcək mütəxəssis kadrların müsahibə mərhələsində vəzifəsi üzrə bacarığı müvafiq meyarlar üzrə 10 ballıq sistem əsasında qiymətləndirilib.
Müsahibəyə 7 vakant vəzifənin tutulması üçün 28 namizəd müraciət edib, onlardan 15 uyğun namizəd müsahibə mərhələsində iştirak hüququ qazanıb. Onlardan 5-i müvafiq keçid balını toplaya bilib.
Qeyd edək ki, qaydalara əsasən müsahibədə 100 ballıq sistemdən 60 və ya daha çox bal toplamış namizədlər bu mərhələdən keçmiş sayılır. Müsahibənin yekun nəticələri “Namizədin qiymətləndirilməsinə dair yekun protokol”da öz əksini tapır.
İşə qəbul müsahibəsində obyektivliyin və şəffaflığın tam təmin edilməsi məqsədilə müsahibənin videoçəkilişi də aparılıb.
Yeni yaradılan STEAM Təlim-Tədris Mərkəzində ilk mərhələdə məktəblərdə təhsil alan istedadlı və bacarıqlı şagirdlərdən ibarət şagird bankı yaradılacaq. STEAM dərslərinin tədrisi üçün 2 illik dərs proqramları hazırlanacaq. Daha sonra proqrama uyğun olaraq şagirdlər dərsdən sonra mərkəzə cəlb ediləcək. STEAM dərsləri 3D çap, microbit və arduino ilə proqramlaşdırma, elektrik mühəndisliyi, robotexnika, CNC lazer kəsiciləri, pilotsuz uçuş aparatları (tədris dronları) üçün hazırlanmış tədris proqramı üzrə təşkil olunacaq. Burada şagirdlər həm proqram əsasında, həm də öz ideyaları ilə texnoloji layihələr reallaşdıra biləcək, elmi araşdırmalar aparacaq, prototiplər yaradacaq, robot modelləri quracaq və onları məhsula çevirəcəklər.